Ekonomiya sang Iloilo nagsanyog sang 2022

SYUDAD SANG ILOILO (PIA6) – Parehas nga nagsanyog ang ekonomiya sang syudad kag probinsya sang Iloilo sang 2022, base sa datos sang Philippine Statistics Authority (PSA)-Iloilo.

Sa ginhiwat nga Dissemination Forum para sa 2022 Provincial Products Accounts (PPA) sang Nobyembre 29, ginpahayag sang PSA-Iloilo nga nakakuha sang 8.5 percent nga growth rate ang probinsya nga nagabalor sang halos P206 bilyon, mas mataas kung ikumpara sa 4.5 percent sini nga Gross Domestic Product (GDP) sang 2021.

Suno kay Engr. Jerry L. Dolutan nga Supervising Statistical Specialist sang PSA-Iloilo nagsaka sang 14 percent ang Services sa probinsya, samtang yara naman sa 7 percent ang industry.

Pila naman sa mga masanyog nga industriya sa probinsya amu ang Accomodation and Food Service nga may 36.7 percent, ginasundan sang Other Services nga may 33.8 percent, kag Transportation and Storage nga may 27.1 percent.

Nakitaan naman sang pagnubo ang Agriculture, Forestry and Fishing nga may ara lang sang 0.5% sa 2022 apisar makabig nga isa ka agricultural province ang Iloilo.

Ginpahayag ni Mario Nillos nga hepe sang Provincial Planning and Development Office (PPDO) nga ang pagnubo sang industriya sang agrikultura ang bangud man sa mga kalamidad sang 2022 pati na sang pagpanghalit sang African Swine Fever (ASF).

Apang ginsiguro man ni Nillos mga ginahatagan sa gihapon sang importansya ni Gobernador Arthur Defensor Jr. ang industriya sang agrikultura kag pagpangisda sa probinysa pinaagi sa mga programa kag polisiya angut sa sini nga mga industriya.

“Iloilo Gov. Arthur Defensor Jr. has always prioritized the agricultural landscape of the province by not letting industrial projects related to modernization fully affect the province’s agriculture industry […] Agri-industry is still at the forefront of the provincial government’s strategy to improve the local economy,” pahayag ni Nillos.

Sa P955.02 bilyon nga 2022 Gross Regional Domestic Product (GRDP), nagpangaduha sa may pinakadako nga share ang Iloilo Province nga may 21.6% kag ginsundan sang 15.2% sang Iloilo City.

Sa pihak nga bahin, nagsaka man ang GDP sang Iloilo City sa 9.6% nga may balor P145.05 bilyon halin sa 6.8% ukon halos P132.38 bilyon sang 2021.

Kaangay sa probinsya, nagsaka sang 14.7% ang Industry kag 9.4% ang Services sang syudad, samtang pila sa mga masanyog nga industriya sa probinsya amu ang Accomodation and Food Service nga may 52.4 percent, ginasundan sang Other Services nga may 41.2 percent, kag Construction Industry nga may 36.9 percent.

Ginkalipay man ni Mayor Jerry P. Trenas ang pagsanyog sang ekonomiya sang syudad kung sa diin ginalauman sini nga mas madamo pa gid nga mga negosyante ang magkadto.

“Our common efforts to attract investors and propel economic activities have paid off. The productive results will strengthen the city’s standing as a leading investment destination and sustain the momentum of continued development for the benefit of Ilonggos,” pahayag sang alkalde. (AAL/JNH/PIA Iloilo)

In other News
Skip to content