Cebuano News: DepEd mi-awhag nga unahon pagtanum ang kawayan

By Rutchie C. Aguhob

Wednesday 27th of June 2012

OROQUIETA CITY, Misamis Occidental, Hunyo 27 -- (PIA) – Gi-awhag ang tanang regional director ug mga division superintendents sa DepEd kun Department of Education nga unahon pagpananum ang kawayan diha sa mga kalihokan sa tree-planting nga ipahigayon diha sa ilang mga nasakopan nga lugar.

Kini ang giluwatan ni Secretary Armin Luistro sa DepEd Memo 102 nga iyang gipakanaug kaniadtong Hunyo 18, ning tuig, base sa Memo Circular No. 30, serye sa 2012, gikan sa Office of the President nga nag-ulohan, “Directing the Full Implementation of the Philippine Bamboo Industry Development (PBID) Program.”

Pinirmahan ni Executive Secretary Paquito N. Ochoa, Jr., ang MC 30, nga penitsahan sa May0 30, 2012, nagmando sa tanang mga departamento ug ahensiya sa nasudnon nga kagamhanan, lakip na ang mga state universities and colleges (SUC’s), mga government-owned and controlled corporations (GOCC’s) ug local government units (LGU’s) sa paghatag suporta sa pagpatuman sa PBID Program.

Ang PBID gihimo nga priority o nag-unang programa sa gobyerno sumala sa Executive Order No. 879, s. of 2010, nga mitukod sa PBID Council, kinsa gitahasan nga mohatag sa overall [policy kun kinatibuk-an nga mga tamdanan ug direksiyon sa PBID Program.

Gipangunahan sa Department of Trade and Industry (DTI), ang PBID Council naglangkob ning mosunod nga mga ahensiya: DepEd, Department of Environment and Natural Resources (DENR), Department of Agriculture (DA), Department of Science and Technology (DOST), Department of Labor and Employment (DOLE), League of Municipalities of the Philippines (LMP) ug mga representante gikan sa mga non-government organizations ug Private Industry Associations (PIA).

Sa laing bahin, ang MC 30 mihan-ay sa EO 26, serye 2011, nga nagpahayag sa National Greening Program (NGP), isip nag-una nga programa sa gobyerno nga maoy mopahiluna sa pagpananum ug kakahuyan sa nasud ug naglista sa kawayan nga angayan ipasanay ubos niini nga programa.

DENR, Department of Agriculture (DA) ug Department of Agrarian Reform (DAR), ilalom sa EO 23, serye 2011, ang gimandoan sa pagpatuman sa NGP, sa pagtambayayong sa DepEd, the Commission on Higher Education (CHED), Department of Social Welfare and Development (DSWD), Department of Budget and Management (DBM), pribadong sector, ug uban pang ahensiya sa gobyerno nga adunay kalambigitan sa NGP.

Tungod niini, ang PBID Council ug ang DENR, isip nag-unang mga ahensiya sa pagpatuman sa NGP ang gitahasan sa pagkombuya pagpa-angay ug pagtumbok sa mga lugar diin ipatuman ang PBID ug NGP.

Bag-ohay pa lamang, si Secretary Luistro miingon nga ang DepEd mopatuman sa PNOY One Billion (1B) Trees Project sulod sa tuig-tingtungha 2012-2013 ug himoon kini sa mga elementary ug high school sa pampublikong eskwelahan matag Sabado sugod sa Hunyo 2012 hangtud Marso 2013.

Ang maong proyekto maoy usa ka tree planting, tree rearing ug tree growing nga paga-apilan, dili lamang sa mga estudyante ug mga magtutudlo, kun dili lakip na ang mga ginikanan, ug uban pang mga stakeholders sa komunidad, dugang pa ni Secretary Luistro. (PIA-Mis. Occ.)