Cebuano news: SOLECO manghatag og P 10 million patronage credit sa mga konsumedor

By Marcelo M. Pedalino

Thursday 12th of July 2012

MAASIN CITY, Southern Leyte, July 12 (PIA) -- Ang Southern Leyte Electric Cooperative (SOLECO) mag-apod-apod og mga patronage credit certificates ngadto sa kapin sa 60,000 ka konsumedor, indibidwal man o institusyon, lukop sa 500 ka mga barangay sa tibuok lalawigan.

Sumala kang kanhi officer-in-charge Archie Salazar, ang patronage credit -- nailhan nga patronage refund sa mga credit cooperatives -- mokabat og P 10 million, apan ihatag kini sa duha ka hut-ong: P 5 million karong tuiga, ug laing P 5 million sa unang tulo ka bulan sa 2013.

Si Salazar nagpahimangno na ning maong maayong balita alang sa mga tig-gamit og kuryente diha sa naghinapos nga bahin sa cable TV “Action Center” Kapihan sa PIA program sa miaging semana, kanus-a iyang gibutyag nga ang maong pagpanghatag ipaagi og patronage credit certificates.

Ang mga certificates adto ipakang sa na-konsumo nga kuryente sa mga konsumedor sugod sa bayronon sa sunod bulan, Agosto.

Kon ang usa ka individual o institusyon, pananglitan, dunay bayronon nga P 1,000 alang sa bulan sa Agosto, 2012, ug ang patronage credit nga iyang nadawat P 500, nan modugang na lamang siya og P 500 diha sa pagpakita sa maong certificate inig bayad, si Salazar mipasabot.

Ang patronage credit gibase kini sa elektrisidad nga na-konsumo sa milabay nga lima ka tuig, gikan sa 2006 hangtud 2010, si Salazar midugng pag-ingon.

Sa follow-up nga tawag kagahapon sa buntag, si Salazar miingon ang kantidad sa patronage credit nga ma-angkon sa kada user gi-compute pinaagi sa pag-sumada sa binulan nga bill sulod sa lima ka tuig gibahin sa kinitaan sa lima ka tuig, ug gipilo sa gikaigon nga fund release nga mao ang P 5 million karong tuiga, P 5 million sunod tuig.

Kini nga kalambuan mitumaw dihang ang SOLECO board nagpalabang og Resolution number 78-2012 pagka Abril 20, 2012, nga naghangyo sa National Electrification Administration (NEA) og pagtugot nga ihatag ang P 10 million patronage credit sa anam-anam, ug ang NEA wala mobabag sa maong katuyoan, ni Salazar pa.

Gidugang pa niya nga sa napulog-usa (11) ka mga electric cooperatives sa rehiyon 8, bugtong ang SOLECO lamang ang labing unang nakahatag og patronage refund sa mga power consumers niini.

Ang mga field personnel sa SOLECO nagsugod na sa paghatag sa mga certificates sa 40 ka mga barangay sa Maasinc City, dayon isunod na ang ubang mga kalungsoran, si Salazar usab miingon. (PIA8-Southern Leyte)