Hiligaynon news: PhilHealth magasugod sang kampanya para sa social health insurance

By Lilibeth A. French

Thursday 9th of August 2012

SYUDAD SANG ILOILO, Agosto 9 (PIA6) -- Ang Philippine Health Insurance Corporation (PhilHealth) magasugod sang isa ka educational campaign natuhoy sa social health insurance sa bilog nga pungsod bilang kabahin sang iya pagpanikasog nga mapat-ud nga ang tagsa ka Pilipino may yara sang mas masangkad nga access sa health care.

Si PhilHealth 6 Regional Vice President Dennis Mas nagsiling sa iya invitation letter nga ginpadala sa Philippine Information Agency nga ang kampanya ginatawag “PhilHealth SHInES: Social Health Insurance Educational Series" magahatag sa mga nanuhaytuhay nga sektor sang husto nga kinaalam kag ihibalo natuhoy sa social health insurance.

Diri sa Kabisayaan Nakatungdan, ang educational campaign pagahiwaton sa duha ka adlaw humalin Agosto 16 tubtub 17, 2012. Ini ang pagasuguran sang SHInES caravan sa palibot sang mga mayor nga dalanon sang siyudad sang Iloilo humalin sa rehiyunal nga talatapan sang PhilHealth sa dalan J. de Leon mga alas 10 ang takna sa aga sa Agosto 16.

May summit man nga pagahiwaton sa Amigo Terrace Hotel, Iloilo City sa Agosto 17 nga pagapasakupan sang tanan nga pinunong lokal sa rehiyon. Si PhilHealth President kag CEO Dr. Eduardo Banzon ang ginapaabot nga magapasakop man sa summit.

Sa hapon sang amo man nga petsa, igalantsar sang PhilHealth ang bag-o sini nga Primary Care Benefit 1 Package sa syudad sang Iloilo. Ang paglantsar pagatambungan nanday Mayor Jed Patrick Mabilog kag iban pa nga opisyal sang City Health officers kag tinawo sa Iloilo City Hall.

Ang Primary Care Benefit 1 Package ang available para sa mga miyembro sang PhilHealth sa idalum sang iya Sponsored Program, Organized Group kag Overseas Workers Program. Ang mga benepisyaryo ang makaagum sang nagapanguna, kalidad nga serbisyo sa ikaayong-lawas pinaagi sa mga accredited nga publiko nga health care providers sa bilog nga pungsod sa idalum sang programa.

Ang mga nagapanguna nga benepisyo nalakip sa PCB I Package ang konsultasyon, regular nga blood pressure monitoring kag health promotion kasubong sang edukasyon sa breastfeeding, counseling natuhoy sa lifestyle modification kag smoking cessation.

Mga bulong sa pila ka mga ginkilala nga mga ordinaryo nga balatian nga ginalauman igahatag sang health provider ang nalakip man sa package. Subong man available ang mga diagnostic services kasubong sang kumpleto nga blood count, urinalysis, sputum microscopy, fasting blood sugar, lipid profile kag chest x-ray.

Ang SHInES kag ang bag-o nga PCB I Package ang pila lamang sa mga inisyatibo nga ginlantsar sang PhilHealth agud labi pa mapasangkad ang National Health Insurance Program agud mapat-ud ang coverage sang tanan nga mga Filipino, ilabi na ang mga imol, kag maayo nga proteksyon pinansyal sang iya mga miyembro sa padayon nga paglab-ot upod ang Department of Health sang Universal Health Care ukon Kalusugang Pangkalahatan nga plano sang administrasyong Aquino sa ikaayong lawas. (JSC/LAF-PIA6 Iloilo)