Hiligaynon news: Army magahatag duta sa mga tumandok

SYUDAD SANG ROXAS, Capiz, Aug 4 (PIA) -- Desidido ang mga katapu sang Philippine Army sa paghatag sa mga tumandok sang kabahin sang duta nga nasakupan sang military reservation area sa banwa sang Jamindan.

Ginpahayag ni 3rd Infantry Division Commander Jose Mabanta Jr. nga nakahanda sila sa paghatag sang porsyon sang duta sa mga tumandok ukon indigenous people (IP) sa ngalan sang katawhayan kag progreso.

Suno pa kay Mabanta nga ang paghatag sang kabahin sang amo nga kadutaan ang dapat ipaagi sa husto nga proseso kag kinahanglanon sang laye sa pagpanagtag sini kag dapat pagahinalaan sang maayo kaupod ang National Commission on Indigenous Peoples (NCIP) agud masabat ang mga isyu sang mga tumandok sa banwa sang Jamindan kag Tapaz.

Ang kampo nga ginapahamtangan sang 3rd Infantry Division sang Philippine Army amo ang ika-tatlo sa pinakadaku nga kampo sang militar sa bug-os nga Pilipinas.

Sa ginhiwat nga sinapul sang Provincial Peace and Order Council sang Capiz, nagpahayag sang kalipay si Governor Victor Tanco sa plano sang Philippine Army sa paghatag sang porsyon sang duta nga nasakupan sang amo nga kampo sa Jamindan para sa mga tumandok.

Para kay Tanco, ang ini nga lihok ang makadugang sa pagpamatuod sang katampad sang gobyerno sa iya handom nga malab-ot ang katawhayan, progreso kag kauswagan sa pungsod.

Angot diri, natalana nga pagaimbitaron sang PPOC ang tiglawas sang NCIP para sa paghatag sang mga plano nga kasugtanan sa pagpanagtag sang duta para sa mga tumandok sa amo nga lugar. (JCM/JBG/PIA6-Capiz)

Number of Comments: 0

  

  

• Notices
• PCDSPO
• Speeches

News from the Regions

PIA eMagazines