Hiligaynon news: Gobyerno kag pribado nga grupo nagtingub para sa paghanda sa kalamidad

Tuesday 17th of July 2012

SYUDAD SANG ROXAS, Capiz, Hulyo 17 (PIA) -- Nagtingub ang mga ahensya sang gobyerno kaupod ang pribado nga grupo agud mapasangkad ang pagpanghanda kontra sa mga kalamidad.

Sining karon lang, ginlunsyar ang duha ka mga proyekto para sa tatlo ka pili nga banwa para sa pag-implementar sang “Pagpakigbuylog sa Pagpangaman” kag Building a Resilient and Gender Responsive Communities in Selected Hazard Prone Areas in Western Visayas nga mga proyekto sang Office of Civil Defense Region VI.

Kaupod sang OCD para sa amo nga proyekto nga mga binuligay kontra sa kalamidad ang Pharmaceutical and Healthcare Association of the Philippines (PHAP)-PHAP Cares Foundation,
Inc.

Ang mga banwa sang Sapian, Pontevedra kag Sigma ang tatlo ka mga banwa sa Capiz nga napilian bilang nalakip sa pilot nga lugar sa pag-implementar sang nasambit nga mga proyekto sa Western Visayas.

Sanday OCD Western Visayas Regional Director Rosario T. Cabrera kag PHAP Cares Chief Executive Officer Reiner W. Gloor amo ang personal nga nagpirma sang kasugtanan ukon Memorandum of Agreement sa tunga sang ila tagsa ka talatapan kag sang nasambit nga mga banwa, samtang si Provincial Administrator kag Legal Officer Jose O. Villanueva amo ang nagpirma para kay Governor Victor Tanco.

Si Lt. Col. Perfecto Peñaredondo naman ang nagtiglawas kay Undersecretary Proceso Domingo nga amo man ang nagapamuno sang Special Concerns sang National Disaster Risk Reduction and Management Council.

Ginpaathag ni Cabrera nga ang nasambit nga mga proyekto ang may tuyo nga mahatagan sang dugang nga ihibalo kag paghanas ang mga pumoluyo kag mga opisyales sang nasambit nga mga banwa kag kabarangayan agud mangin handa kag mapaiway ang daku nga kahalitan dala sang mga kalamidad ilabi na sang baha.

Kabahin man sa amo nga tinutuyo ang pagpaayo sang serbisyo medikal kag paghimo sang mga tikang kag pamaagi nga mangin tayuyon ang pagpanghanda sang mga pumoluyo. (JSC/JBG-PIA6 Capiz)