Hiligaynon news: Mga taga medya sa Capiz magasaulog sang World Communications Sunday

SYUDAD SANG ROXAS, Capiz, Mayo 17 (PIA) -- Magatililipon ang mga katapu sang medya sa Capiz para sa pagsaulog sang World Communications Sunday sa Mayo 20 sa pagpanikasog sang Episcopal Commission on Social Communications and Mass Media sang Archdiocese sang Capiz.

Ginpahayag ni Rev. Fr. Jose Arturo Emilio Arbatin nga amo ang nagapamuno sang Commission on Social Communications and Mass Media sang Archiocese sang Capiz nga ang pagsaulog sang nasambit nga kahiwatan ang isa ka tradisyon sang simbahan sa pagpakita kag paghatag ihibalo sa pagkamalahalon sang social communication.

Suno pa kay Arbatin nga sumugod tuig 1967, ang simbahan katoliko ang padayon nga nagapakita sang iya obligasyon sa pag palapta sang mga mensahe tuhoy sa nagkalain-lain nga mga tema, subong sang kultura kag relihiyon pinaagi sa social communication.

Ginpahayag man niya nga ang mensahe ni Pope Benedict XVI para sa sini nga selebrasyon nga “Silence and Word: Path to Evangelization” ang nagapahayag sang proseso sang komunikasyon nga amo ang silence ukon reflection.

Ang selebrasyon sa Capiz ang pagasuguran pinaagi sa isa ka misa nga pagapangunahan ni Capiz Archbishop Jose F. Advincula Jr., sa diin patigayunon man ang pagbendisyon sa mga katapu sang medya.

Pagasundan man ang kahiwatan pinaagi sa isa ka media fellowship kag sa hapon naman pormal nga pagabuksan ni Archbishop Advincula ang isa ka photo exhibit sa isa ka mall sa Arnaldo Boulevard. (JSC/JBG-PIA6 Capiz)

Number of Comments: 0

  

  

• Notices
• PCDSPO
• Speeches

News from the Regions

PIA eMagazines