Hiligaynon News: DILG magapasidungog sa mga lokal nga pamunuan nga handa sa kalamidad

SYUDAD SANG ROXAS, Capiz, Mayo 9 (PIA6) --Pagakilalahon kag pasidunggan sang Department of the Interior and Local Government ang mga lokal nga pamunuan ukon Local Government Unit nga handa sa tion sang kalamidad.

Suno kay DILG Secretary Jesse Robredo nga ang amo nga paindis-indis nga ginatawag Seal of Disaster Preparedness ang pagatiwahon sini nga tuig agud kilalahon man ang mga hinimuan kag mga tikang sang mga banwa, syudad ukon probinsya nga nagahatag pagtamod sa kahandaan antes kag sa tion sang kalamidad.

Ginpahayag ni Robredo sa iya pagpadulong diri sa Capiz sang nagligad nga bulan nga pinaagi sa amo nga paindis-indis, makita man ang iban pa nga mga kakulangan sa kahandaan sang LGU kag sarang mahatagan sang nagakaigo nga solusyon agud mas mapaayo pa ang preparasyon kag mga plano sang amo nga pamunuan.

Ang Seal of Disaster Preparedness ang isa ka inisyatibo sang nasyonal nga pamunuan angot sa gina-atubang nga climate change nga nagaresulta sa pagbakho sang mga pumoluyo.

Sa iya ginpagwa nga DILG Memorandum Circular No. 2012-79, ang amo nga paindis-indis ang magahatag pagtamod sa Disaster Preparedness kag sa Disaster Preparedness-Response.

Ginpahayag naman ni Capiz DILG Provincial Director Helen Mestidio nga ang amo nga paindis-indis ang mangin tulay man indi lang para makilala ang preparasyon kag kapag-on sang mga LGU sa ila programa batok sa kalamidad kag kalalat-an kondi lakip na ang pagsekyar sang mga kakulangan pa nga dapat hatagan pagtamod sang amo nga pamunuan para sa ila pumoluyo.

Nagasalig man si Mestidio nga ang mga banwa, syudad kag probinsya sa Capiz ang may nagakaigo nga preparasyon kag ikasangkol kontra sa kalamidad sandig sa ila mga plano nga ginahimo kag gina-implementrar sang tagsa ka Local Disaster Risk Reduction and Management Council. (JSC/JBG-PIA6 Capiz)

Number of Comments: 0

  

  

• Notices
• PCDSPO
• Speeches

News from the Regions

PIA eMagazines