Kinaray-a news: DSWD nagta-o kang mga kagamitan sa PDRRMC

By Pilar S. Mabaquiao

Tuesday 21st of August 2012

SAN JOSE, Antique, Agosto 21 (PIA6) -- Ang Department of Social Welfare and Development nagta-o kang mga kagamitan sa Provincial Disaster Risk Reduction and Management Council (PDRRMC).

Dya nga mga kagamitan para sa PDRRMC agud may maggamit sa tiun kang kalamidad ilabi na kun may mag awas nga gasolina halin sa mga sakayan pangdagat sa mga baybayun kang probinsya.

Ang naghatod kang amo nga mga kagamitan sa Probinsya kang Antique amo mismo ang Regional Director kang DSWD 6 nga si Minda B. Brigoli.

Ang mga gamit nagalakip kang "generator" para kun mag brown-out may gamiton ang PDRRMC.

Ang iba nga mga kagamitan, amo ang "protective suits, protective goggles, oil resistant boots, rain coats, spray equipment, sleeping bags, gloves, knapsack prayers, flashlights and helmets".

Dya paga gamiton kang PDRRMC sa tiun nga may emerhensya sa baybayun kang probinsya kag hinali nga may mag-awas nga gasolina ukon lana sa mga barko nga ma disgrasya.

Suno kay PDRRM Officer Broderick Train, ang Antique naga kinahanglanun gid kang amo nga gamit tungod sa malawid na kadya nga baybayun kag posible nga may matabo nga disgrasya sa mga barko.

Parehas kang nagligad nga tuig, suno kay Train, may barko nga nalunod marapit sa baybayun kang San Jose.

Sa anang mensahe, ginpangabay gid ni Brigoli ang mga lokal nga otoridad kag mga katawhan nga mangin mabinantayun sa mga hitabu sa palibot kag masunod sa mga panugyan nga mga lokal nga panguluhan ukon ahensya kang gobyerno sa ti-un kang kalamidad ukon kalalat-an.

Si Gobernador Exequiel B. Javier sa anang bahin, nagpasalamat sa DSWD sa mga bulig nga andang gindara sa Antique ilabi na gid sa mga kubos nga katawhan. (JSC/PSM-PIA6 Antique)