Hiligaynon news: PDRRMC nagpanugyan sa mga lokal nga pamunu-an, eskwelahan nga mangin preparado sa mga kalalat-an kag kalamidad

By Pilar S. Mabaquiao

Tuesday 12th of June 2012

SAN JOSE, Antique, June 12 (PIA) -- Ang mga lokal nga opisyales kag mga eskwelahan ginapanugyan kang Provincial Disaster Risk Reduction and Management Council nga mangin preparado sa mga kalamidad kag kalalat-an.

Sa pagpakig-hinun-anun kay Broderick Train ang gin designar nga Provincial Disaster Risk Reduction and Management Officer, sa pag-abot kang tag ururan, nagakadapat gid nga ang mga komunidad preparado sa pagbaha, pagtiphag kang lupa kag iba pa nga mga kalamidad ilabi na sa mga lugar nga delikado parehas kang mga marapit sa suba, ukon sa sikwayan kang mata-as nga bukid.

Bisan nga padayun ang aton kampanya sa kahandaan kang taan paagi sa mga paghanas, ang mga eskwelahan dapat mangin preparado ilabi na nga dya ginahimo nga barakwitan sa ti-un kang emerhensya.

Dugang pa ni Train, nga sa pag umpisa kang klase , bahul nga oras kang mga kabataan ginatiner nanda sa eskwelahan, gani nga dapat sanda makama-an kun ano ang himu-on kun may kalamidad nga mag-abot.

Ang PDRRMC naga sarig sa mga maestro/maestra sa pagtudlo sa mga kabataan kang anda dapat himu-on samtang dugang nga paathag padayunon kang ginikanan sa mga panimalay.

Gindugang hambal ni Train nga may nga komunidad sa Antique nga delikado tungod dya nahamtang sa mga lugar nga marapit ang suba, mataas nga bukid (nga may malum-ok nga sahi kang lupa) ukon manaba nga dali madab-ot kang baha. Dya nga mga barangay makita sa mga banwa kang San Remigio, Hamtic, Sibalom, Culasi, Barbaza, Valderrama kag Pandan.

Ginpangabay man ka PDRRMC ang mga lokal nga pamunu-an sa pag pabugtaw kang mga lokal nga DRRMC kag mag implementar kang programa nga maka pugong ukon makapahagan kang epekto kang kalamidad suno sa ginpatuman kang Republic Act 10121 ukon Philippine Disaster Risk Reduction and Management System.

Ang probinsya kang Antique may masobra sa P36Milyon nga ‘calamity fund’, 70 porsyento kadya pwede gamiton sa mga proyekto ukon programa nga mangin preparado ang mga komunidad sa kalamidad kag kalalat-an kag ang nabilin nga 30 porsyento magamit lamang sa ti-un kang emerhensya para sa "rescue kag relief operations". (JSC/MLG/PSM-PIA6 Antique)