Kinaray-a News: 42 ka mga kabataan maka-agum kang ‘scholarship grant’

By Pilar S. Mabaquiao

Monday 4th of June 2012

SAN JOSE, Antique, Hunyo 4 (PIA) -- May 42 ka mga kabataan ang maka-agum kang "schloarship grant" halin sa nasyonal nga panguluhan bilang padayun nga suporta sa mga imol nga pamilya nga benepisyaryo kang programa nga Pantawid Pamilya.

Ang Department of Social Welfare and Development maga lunsad kadya nga tuig kang programa nga "Student’s Grants Aid" agud mabuligan ang mga ginikanan nga gamay lamang ang ikasarang sa pagpa-eskwela kang andang kabataan.

Suno kay Jeffrey Gabucay ang Provincial Coordinator kang Pantawid Pamilya ang Antique gintaw-an ka 42 ka mga iskolar nga mahalin sa banwa kang Bugasong, Caluya, Culasi, Hamtic, Laua-an, Patnongon kag San Remigio.

Ang kada banwa may anum ka iskolar nga magabaton kang P60,000 kada tuig ukon P30,000 kada semestre. Dya paga-gamiton bilang bayad sa tuition fee, libro, unipormi, pagkaon kag gina-uli-an kag iba pa nga baraydanan sa eskwelahan.

Ang solo nga eskwelahan para sa mga iskolar ridya sa Rehiyon 6 amo ang West Visayas State University kag sanda magapili sa mga masunod nga kurso Bachelor in Elementary and Secondary Education, Bachelor of Science in Information Technology and Information Management, Bachelor of Science in Applied Mathematics, Agriculture and Forestry kag Bachelor of Arts in English, paathag ni Gabucay.

Dugang hambal ni Gabucay nga kun makatapos ang iskolar sa mga nasambit nga kurso, sigurado nga sanda may orobrahan. Amo dya ka sinsiro ang gobyerno sa pagbulig sa mga imol, kuon ni Gabucay.

Gani ana gin hangkat ang mga ginikanan sa pagsuporta sa andang mga kabataan kag sa mga iskolar sa pag eskwela ka mayad. (JSC/MLG/PSM-PIA6 Antique)