Hiligaynon News: May mag byahe na nga eroplano sa Antique

By Margie L. Gadian

Saturday 23rd of June 2012

SAN JOSE, Antique, Hunyo 23 (PIA6) -- May mayad nga balita para sa mga Antiqueños. Ang sangka Cebu-based nga kompaniya kang eroplano nag komitir nga mag serbe kang Manila-San Jose, Antique nga rota kag pabalik umpisa sa Agosto kadya nga tuig.

Suno kay Vice-Governor Rosie Dimamay, ang hepe kang Commercial Services Department of Midsea Express, nga si Glenn Lamela, nag bisita sa probinsya kadya lang.

Si Lamela nag inspeksyon kang facilidad sa Evelio B. Javier Airport sa crossing Funda-Landing kag ana gin komitir ang andang pag suporta sa mga taga Antique.

Suno kay Dimamay, ang mga flight schedules kang eroplano iga hambalan nanda sa pagbalik ni Lamela sa Antique.

Dugang pa hambal ni Dimamay, nga ang Midsea Express komitido sa pagbulig sa mga Antiqueños kag sangka bahul dya nga bulig sa ekonomiya kang probinsya.

"Ang atun katawhan indi ron mag antus kang darwa ka oras nga byahe pa Sta. Barbara, Iloilo para may kumportable, madasig kag konbeniente nga byahe tungod nga kita may eroplano ron nga maga-abot kag magahalin mismo dya sa atun capital nga banwa," hambal ni Dimamay.

Suno kay Lamela, may 19-seater nga Jetstream, sangka manami nga British Aerospace aircraft, nga magalupad kang rota Manila-San Jose, Antique.

Hambal pa ni Lamela nga ang Midsea Express maga palapad man kang andang serbisyo paagto sa Iloilo-Puerto Princesa, Palawan para sa nagaduro nga negosyante kag turista.

Ang Midsea Express, sangka magamay nga air-transport company nga nabase sa Mactan, Cebu kag sa tulad naga serbe kanga masunod nga rota: Cebu-Tagbilaran, Cebu-Camiguin, Cebu-Bislig, Cebu-Tandag kag Tagbilaran-Davao. (JSC/MLG-PIA 6 Antique.)