Aklanon news: DOTC, maga alokar it P59.49 milyon para sa KIA

By Venus G. Villanueva

Friday 17th of August 2012

KALIBO, Aklan, Agosto 17 (PIA) -- Maga alokar ro Department of Transportation and Communication (DOTC) it P59.49 milyones para sa pagpamayad-ayad pa gid it Kalibo International Airport (KIA).

Ro pagpamayad-ayad sa KIA hay ginasakupan it ‘asphalt overlay’ ku ana kara nga runway, pagkonreto it anang ‘apron’ ag pagbutang it ‘security fence’, suno sa ginpublikar kurundaya eamang nga “invitation to bid” it DOTC sa sangka nasyonal nga pahayagan.

Ro proyekto sa KIA hay dungan nga iga implementar it DOTC sa daywa pang ka airport sa nasyon – sa San Vicente sa Palawan ag Sanga-Sanga sa Tawi-Tawi.

Ika-pito makaron ro KIA sa mga pinakamasako nga airport sa nasyon.

Ginapanan-aw nga ro pagpamayad-ayad it KIA hay makapabaskog pa gid sa industriya it turismo it Aklan, kon siin ro mayor kara nga haligi hay imaw rong isla it Boracay.

Sa makaron, ro mga airlines nga naga gamit it KIA hay imaw rong Philippine Airlines (PAL), Cebu Pacific, Zest Air, AirAsia ag China/Mandarin Airlines.

Nagatugpa dikara ro mga international flights halin sa Korea, Hongkong ag Taipei ag mga domestic flights paadto ag halin sa Manila, Cebu, Clark ag ro kurundaya eamang ha lunsar nga Kalibo-Davao.

Base sa listahan it Civil Aviation Authority of the Philippines (CAAP), ro KIA hay nagabaton it 20 hasta 25 nga flights adlaw-adlaw kon siin may 2,500 kara nga mga pasahero halin sa international ag domestic flights ro gina serbisyuhan. (JSC/VGV-PIA6 Aklan)