Aklanon news: Mga Koreano pinaka-abu sa mga turistang nag-adto sa Boracay

Thursday 9th of August 2012

KALIBO, Aklan, Aug 9 (PIA) -- Pinaka-abu ro mga Koreano sa mga turista nga nagbisita sa isla it Boracay sa buean it Hulyo sa dag-on ngara.

Suno sa lista nga gintao it Provincial Tourism Operations Office (PTOO), ro mga Koreano nga nag-abot sa Boracay ku Hulyo hay nag-abot sa 18,224, samtang ro mga Taiwanese hay maeayo nga pangaywa nga may 8,517, ag mga Chinese, nga 2,669.

Ro pila pa gid nga mga turistang dumueuong nga nagbisita sa isla hay naghalin sa United States of America, nga may 1,426; Australia, 909; Hongkong, 532; Japan, 475; Russia, 447; Germany, 440; ag Saudi Arabia, 408.

Ro "tourism receipts" nga naagum halin it Hulyo 1-24 hay nag-abot sa P1.13 bilyon.

Sa pihak nga parte, ro kabilugan nga tourism receipts halin ku buean it Enero hasta Hulyo hay nag-abot sa P14.1 bilyon.

Samtang, base sa pinaka-ulihi nga lista it PTOO, ro mga nag-abot nga turista halin ku Hulyo 1 hasta 31 sa dag-on ngara nga 79,637 hay mataas gihapon it 22 porsiyento ku sa mga nag-aeabot ku nagtaliwan nga dag-on sa kapareho nga buean nga may 65,431.

Kumpara sa ibang mga binuean sa dag-on ngara, pinakamanaba ro sa Hulyo bangud sa habagat.

Sa mga buean, pinakamataas nga halista nga nag-abot nga turista ku Abril nga may 161,504; Mayo, 139,452 ag Marso, 118,177. (JSC/VGV-PIA6 Aklan)