Hiligaynon news: Sobrang P31-M igapanupod sa mga benefisyaryo it 4Ps sa Aklan

By Venus G. Villanueva

Saturday 4th of August 2012

KALIBO, Aklan, Agosto 4 (PIA) -- May kabilugan nga 20,510 nga mga panimaeay nga benepisyaryo it Pantawid Pamilyang Pilipino Program (4Ps) sa Aklan ro magabaton sa buean ngara it Agusto it P31,530,300 nga “cash grants.”

Ro kwarta, nga igatao sa “over-the-counter” nga paagi, hay naga representar it andang benefisyo para sa buean it Mayo ag Hunyo.

Sa anang sueat kay Governor Carlito S. Marquez para sa nasambit nga aktibidad, ginsugid ni Dr. Minda Brigoli, Regional Director it Department of Social Welfare and Development (DSWD) nga mangin kaibahan nanda sa pagpaguwa ukon pagpagua it kwarta ro Land Bank of the Philippines (LBP) halin it Agusto 3 hasta it Agusto 30.

Ro kwarta hay igapanao kaeabanan sa mga municipal gym it mga banwa mageuwas sa Malinao.

Sa 15 nga mga banwa, ro Ibajay ro may pinakaabu nga benefisyaryo nga may 2,370, nga magabaton it kabilugan nga P3,652,300 milyon.

Ginasundan ra it Libacao, nga may 2,120 nga “grantees” ag P3,202,200 nga cash; New Washington, nga may 1,953 nga benepisyaryo ag P2,940,300 nga cash; Batan, 1,780 nga grantees ag P2,709,600 nga cash; ag Balete, may 1,242 nga benefisyaryo ag P2,651,700 nga cash.

Ro iba pa gid nga mga banwa hay ro Nabas, may 1,140 nga benepisyaryo ag P2,250,800 nga cash grant; Banga, 1,486 grantees ag magabaton it P2,250,800 nga casg; Banga, may 1,485 nga grantees ag P2,225,600 nga cash; Malay, 1,359 nga grantees ag P2,110,000 nga cash; Madalag, 1,300 nga grantees ag P1,985,900 nga cash; Tangalan, 1,198 nga grantees ag P1,821,600 nga cash; Altavas, may 1,242 nga grantees ag P1,765,500 nga cash; Buruanga, may 847 nga grantees nga makabaton it P1,277,200 nga cash ag Lezo, may 554 nga grantees ag P713,900 nga cash.

Ro banwa it Malinao, nga may siyam eamang nga benepisyaryo para sa nasambit nga over the counter nga pagpanao it kwarta, hay magabaton it kabilugan nga P13,500.

Sa makaron, ro banwa it Kalibo ag Numancia eamang ro owa haeakot sa programa it 4Ps sa Aklan. (JSC/VGV-PIA6 Aklan)