Hiligaynon news: Daywang ka barangay sa Aklan iga survey sa 'consumer expectation'

By Venus G. Villanueva

Monday 9th of July 2012

KALIBO, Aklan, July 9 (PIA) -- Daywang ka barangay sa Aklan – Bay-ang sa Batan ag Dumaguit sa New Washington ro maga serbe nga "sample areas" sa survey it Bangko Sentral ng Pilipinas nahanungod sa "consumer expectations."

Ro magapatigayon it pag survey hay imaw rong National Statistics Office (NSO) nga nag-umpisa eon it libot ro 39 nga mgapanimaeay umpisa it unang dominggo it Hulyo.

Suno kay Blas Solidum, Provincial Statistics Officer it NSO-Aklan, tuyo it survey nga bue-on ro panan-awan it mga konsumidor sa andang pinansyal nga sitwasyon, kundisyon it ekonomiya it nasyon ag ro pangkabilugan nga paghueag it gobyerno.

Gindugang ni Solidum nga ro Consumer Expectation Survey (CES) hay sangka paagi it pagtipon it impormasyon nga sakup ro 5,000 nga "sample" sa bilog nga nasyon.

Importante ro mga impormasyon nga matipon sa pagpanan-aw sa paaeabuton nga direksyon it pangnasyon nga ekonomiya.

Ro mga kapareho nga survey, suno sa NSO, hay hahiwat eon sa Estados Unidos, Canada, Finland, France, Germany, Italy, Japan, ag Taiwan ag hapamatud-an nga epektibo.

Sa Pilipinas, importante gid ro survey bangud ro ginagasto it mga konsumidor hay katumbas it katunga it gross domestic demand para sa mga produkto ag serbisyo.

Ginhambae ni Solidum nga ro responsibilidad it NSO sa survey hay magkolekta it mga impormasyon samtang ro BSP ro maga analisa it mga resulta.

Ro mga pangutana sa survey hay nagasakup it tatlong ka sentimyento it konsumidor: personal nga sitwasyon pinansyal, kondisyon sa negosyo ag kondisyon sa pamaeakeon.

Magagiya man sa mga magaplano sa pagtan-aw it direksyon it pagbag-o sa ekonomiya imaw man ro sitwasyon sa "inflation rate, interest rate ag exchange rates," dugang ni Solidum. (JSC/VGV-PIA 6 Aklan)