Aklanon news: Mga benefisyaryo it 4Ps sa Aklan nagbaton it P32 milyon nga cash grant

By Venus G. Villanueva

Friday 6th of July 2012

KALIBO, Aklan, Hulyo 6 (PIA6) -- May kabilugan nga P32,867,000 milyon nga cash grants para sa 22,136 nga mga benefisyaryo it Pantawid Pamilyang Pilipino Program (4Ps) ro ginpaguwa it Department of Social Welfare and Development (DSWD) paagi sa Provincial Social Welfare and Development.

Ro cash grant hay para sa 15 nga mga kabanwahunan nga resipyente it programa.

Sa mga banwa ngara, ro Ibajay ro may pinakamaabo nga mga benefisyaryo nga may 2,384, kon siin nakabaton sanda ra it kabilugan nga P3,676,600.00.

Ro iba pang mga banwa nga abu ro benefisyaryo ag ro mga habaton nga cash grant hay imaw rong Libacao, nga may 2,134 beneficiaries ag P3,154,800 nga cash grant; New Washington, nga may 1,945 nga benefisyaryo ag P2,829,400 nga cash grant; Batan, 1,781 nga benefisyaryo ag P2,642,000 cash grant; Balete, 1,805 nga benefisyaryo ag P2,692,000 nga cash grant, Makato, 1,449 nga benefisyaryo ag P2,141,300 cash grant; Malay, 1,351 nga benefisyaryo ag P2,062,000 nga cash grant, ag Banga nga may 1,463 nga benefisyaryo ag P2,052,100 nga cash grant.

Ro habilin nga mga banwa hay may cash grant nga masobra sa sang milyon euwas eang sa Lezo nga may pinakasangkiri nga benefisyaryo ag habaton nga P791,700.00.

Ro Lezo man ro pinakaulihi nga nag entra sa programa it 4Ps.

Samtang, ginpahayag kurundaya eamang ni Elma Malbas, Provincial Social Welfare and Development Officer nga ro Kalibo ag Numancia nga imaw lang ro habilin nga owa sa 4Ps hay makaentra eon sa programa sa maabot nga 2013. (VGV PIA 6 Aklan)