Aklanon news: Bag-ong Day Care Center ginpatindog sa sueod it kampo

By Venus G. Villanueva

Wednesday 4th of July 2012

KALIBO, Aklan, Hulyo 4 (PIA) -- Sangka bag-o eang hapatindog nga Day Care Center ro makit-an eon makaron sa sueod it kampo it Aklan Police Provincial Office (APPO) sa New Buswang, Kalibo.

Sa sangka report nga naghalin kay PO3 Nida Gregar, Information Officer it APPO, ginsugid nana nga gin-obra ro Day Care Center sa sueod eamang it daywang dominggo.

Ginsugid na pa gid sa anang report nga tuyo it pagpatindog it Day Care Center nga hitun-an ro mga maintok nga mga unga it mga pulis it probinsya sa “early childhood development” imaw man ro pag-umpisa it andang edukasyon.

Ro mga unga ngaa naga-estar sa palibot it kampo hay pagabatunon man sa Day Care Center.

Suno kay APPO Provincial Director Cornelio Defensor, ro pagpatindog it Day Care Center sa sueod it kampo hay resulta it pagtinguha ni PNP 6 Regional Director Cipriano Querol Jr. nga mabuligan ro mga unga it pulis sa Aklan sa pag-umpisa ku andang edukasyon.

Gindugang pa gid ni Defensor nga maswerter ro Aklan PPO nga sambilog sa mga hapilian sa nasyon nga butangan eagi-eagi it Day Care Center.

Ro pagbutang it mga Day Care Center sa mga probinsya hay adbokasiya ni Dr. Noemia Bartolome, asawa ni Chief PNP Police Director-General PCSupt. Nicanor Bartolome.

Ro magaturo sa nasambit nga Day Care Center hay mga Day Care Workers in Provincial Social Welfare and Development Office/Department of Social Welfare and Development ag mga pulis mismo it APPO nga may Bachelor’s Degree sa Edukasyon. (JSC/VGV-PIA 6, Aklan)