Aklanon News: Koleksyon it mga jetty port sa Aklan nagtaas it 44%

By Venus G. Villanueva

Thursday 7th of June 2012

KALIBO, Aklan, Hunyo 7 (PIA6) -- Nagrehistro it 44.86% nga dugang ro ha kolektar it mga jetty ports sa probinsya it Aklan halin ku Enero hasta Mayo it dag-on ngara, suno sa listahan nga ginpaguwa it Economic Enterprise Development Department (EEDD) iya.

Ro mga jetty ports ngara hay sa Caticlan, Malay ag sa Cagban sa Boracay, ag ro gina operar man it Philippine Ports Authority (PPA).

Sa limang buean, naka kolektar ro EEDD it P89,807,766.28.

Kumpara sa koleksyon ku nagtaliwan nga dag-on nga may P61,992,960.21, si Governor Carlito Marquez, nga nagsugid ku rayang balita sa mga Akeanon paagi sa anang regular nga pagpaabot ku anang Governor’s Report to the People hay naghambae nga ro kita it probinsya sa nasambit nga mga buean hay nagtaas it P27,814,806.07.

Sa limang buean nga operasyon, ro Mayo ro may pinakamataas nga kinita nga P31,400,034.84, nga nagrehistro it dugang nga 120.16% kumpara ku nagtaliwan nga dag-on sa kaparehong buean nga may una eamang nga P14,262,122.89.

Ro buean it Abril ro may ikaywang pinakamataas nga hakolektar nga P21,870,825.99, nga nag rehistro it dugang nga 31.18%, bangud ro hakolektar eamang ku nagtaliwang dag-on sa kaparehong buean hay P16,672,225.73.

Ro habilin nga mga buean – Enero, Pebrero ag Marso hay may sobra sa P10 milyones nga ha kolektar kada isaea.

Samtang, ro mga nag-aeabot nga mga bisita sa isla it Boracay hay nagtaas man it 40.14% sa limang buean, kon siin may nag-abot nga mga bisita nga 603,176.

Raya hay mas mataas kumpara ku 2011 kon siin sa kamana nga mga binuean, may harehistro nga 430,383 nga nag aeabot.

Ro buean nga may pinakamataas nga numero it bisita hay Abril nga may 161,504, sumunod ro Marso nga may 118,177 ag Mayo, nga may 117,418.

Abu man ro nag-abot ku enero nga may 110,518 samtang pinakasangkiri ku Pebrero nga may 95,559.

Ku Mayo, abu ro mga lokal nga turista nga nag-abot nga may 86,893 samtang ro mga dumueuong hay 27,039 ag mga Overseas Filipino Workers (OFWs) – 3,396.

Ro tourism receipts sa Mayo 1-25, base sa Provincial Tourism Operations Office (PTOO) hay nag-abot it P1.99 billion. (JSC/VGV-PIA 6 Aklan)