Aklanon News: Proyekto sa pagpangaman kontra kalamidad igalunsar sa Aklan

By Venus G. Villanueva

Tuesday 5th of June 2012

KALIBO, Aklan, Hunyo 5 (PIA) -- Ro Office of Civil Defense – Department of National Defense (OCD-DND) VI, kaibahan ro PHAP Cares Foundation Inc. hay magalunsar sa Hunyo 5 it Pagpakigbuylog sa Pagpangaman ukon Partnership for Disaster Risk Reduction sa banwa it Madalag sa Aklan.

Suno kay Rosario T. Cabrera, OCD-DND VI Regional Director ag Chairperson it Regional Disaster Risk Reduction Management Council (RDRRMC) 6, ro paglunsar, nga hiwaton sa ala-una sa hapon (1:00 p.m.) sa Madalag Covered Gym hay ro pangatlo nga paglunsar sa Western Visayas pagkatapos ku nahiwat eon sa siyudad it Iloilo ku Feb. 6 ag sa Guimaras ku Mayo 15.

Gindugang ni Cabrera nga ro mga katuwang sa Aklan para sa proyekto hay rong mga barangay sa Madalag, Malinao, ag Libacao.

Antes sa paglunsar, may pagahiwaton man nga sangka press conference sa mga representante it mga kaibahang mga ahensya sa proyekto ag lokal nga media.

Iga presenter ni Cabrera ro project brief samtang sanday Governor Carlito S. Marquez ag Reiner W. Gloor, CEO it PHAPCares Foundation, Inc. hay magapaabot man it andang mga mensahe.

May pagahiwaton nga pagpirma it Memorandum of Agreement/Signing of Commitment it mga katuwang nga mga ahensya pareho ku Department of Interior and Local Government (DILG), Department of Social Welfare and Development (DSWD), National Economic and Development Authority (NEDA), Department of Science and Technology (DOST), Department of Health – Center for Health Development Western Visayas (DOH-CHD WV), Department of Agriculture (DA), Department of Environment and Natural Resources (DENR), 3rd Infantry Division Philippine Army, ag PNP Regional Office (PRO) 6.

Pagkatapos it paglunsar, may pagahiwaton man nga medical/dental mission, ceremonial turn-over it mga inugtanum nga mga kahoy, edukasyon sa ikamayad it eawas ag nutrisyon, Briefing sa DRR ag RA 10121 ag Early Warning Signals kaibahan ro BDRRMC it mga barangay ag pagpanupod it DRR iec Materials sa mga resipyente nga mga barangay. (JSC/VGV-PIA6 Aklan)