Hiligaynon news: CSC magahiwat it eksaminasyon para sa Penology Officer

By Venus G. Villanueva

Monday 4th of June 2012

KALIBO, Aklan, June 4 (PIA) -- May tsansa eon ro mga Aklanon nga gustong makatrabaho sa Bureau of Jail Management and Penology (BJMP) nga hibaton paagi sa pagbuoe it ekasaminasyon para sa Penology Officer nga igatao sa Agusto 12 it rayang dag-on sa syudad it Iloilo.

Suno kay Ma. Cynthia P. Aranas, Director II it Civil Service Commission (CSC) Field Office Aklan, ro eksaminasyon hay bukas sa mga nagatrabaho nga mga empleyado it BJMP, mga empleyado it provincial ag sub-provincial nga mga prisohan ag iba pang mga intresadong aplikante.

Ginhambae man ni Aranas nga ro mga nakapasar sa eksaminasyon hay pagataw-an it Penology Officer Eligibility nga ginakonsiderar nga naga kaangay sa ikaywang lebel sa jail management ang iba pang nagakaangay nga serbisyo euwas eang sa rangko it Philippine National Police.

Makapasar ro sangka aplikante kon imaw hay makabuoe it grado nga 80.

Ro mga interesado nga mga aplikante hay sarang makapasa ku andang aplikasyon sa CSC Regional ag Field Offices.

Ro mga nagatrabaho mat-a eagi sa BJMP hay sarang magpasa ku andang aplikasyon sa BJMP Regional Office.

Ro mga application forms hay mabuoe sa CSCROs/FOs ag mahimo ma download sa www.csc.gov.ph.

Ro mga maga apply hay dapat Filipino, may mayad nga pagbinatasan, mayad ro paminsaron ag pangeawason, owa ha sentensyahi it pinal sa mga kaso ukon krimen nga naga imbolbar it immoral nga pamatasan, kawad-an it katampad ag pagdinaya sa eksaminasyon, pagkapaeahilong ag pagkasugapa sa droga ag owa man hapahalin sa serbisyo.

May igatao man nga pagpaiway it "height requirement" sa mga aplikante nga mga katapu ir cultural communities basta magasumiter sanda it sertipikasyon it pagkamiyembro sa sangka cultural community nga gintao it National Commission for Indigenous People (NCIP), suno sa CSC. (JSC/VGV-PIA 6, Aklan)