Aklanon news: Bag-o nga minimum wage sa WV naga epekto eon

Friday 1st of June 2012

KALIBO, Aklan, June 1 (PIA) -- Naga-epekto eon nga Mayo 31, 2012 ro bag-o nga minimum wage rate sa Western Visayas, suno sa Department of Labor and Employment (DOLE).

Ginsugid ni Vidiolo Salvacion, nagapamuno it DOLE-Aklan, nga nangin epektibo ro bag-ong minimum wage rates pagkatapos nga ginpublikar sa mga pahayagan ro Wage Order No. RBVI-20 nga naga taeana sa pagtao it bag-o nga minimum wage rates.

Epektibo makaron nga adlaw, hambae ni Salvacion, ro mga non-agricultural, industrial ag mga establisimientp pang komersyo nga may tawuhan nga sobra sa napueo (10) hay magabaton kada isaea it P277.00 kada adlaw, samtang rato nga may mga tawuhan nga napueo ag panaba hay magabayad sa andang mga trabahante it P235 kada adlaw.

Ro mga naga obra mat-a sa uma hay magabaton it P245.00, samtang ro mga bukon it ga obra sa uma hay magabaton it P235. Kada adlaw base sa bag-o nga panwelduhan.

Ginsugid man ni Salvacion nga abu nga mga trabahador ro nagahueat sa pag-epekto ku rayang pagtaas it sweldo kapin gid sa mga nagatrabaho sa isla it Boracay.

Base sa publikasyon, ro pagdugang it sweldo hay maagum it tanan nga nagabaton it minimum wage sa mga pribado nga sektor sa Rehiyon 6 bisan ano pa ro andang posisyon, designasyon ukon estado it pagtrabaho ag bisan sa ano nga paagi ro pagsweldo kanda.

Ro bag-o nga wage order hay owa nagaeakot it mga kabulig sa baeay, mga tawo nga naga serbisyo it personal sa iba pareho ku mga tsuper it pamilya, ag mga nagatrabaho sa mga rehistrado nga Barangay Micro Business Enterprises (BMBEs) nga may mga Certificates of Authority base sa Republic Act 9178.

Rayang wage order nga naga epekto eon hay ginbaeay ku Marso 26, 2012 sa Malay, Aklan, nga ginpirmahan it daywang ka mga representante it mga tag-ana it establisimiento, daywang representante it mga trabahador, Department of Trade and Industry 6 Regional Director Dominic Abad, National Economic Development Authority (NEDA) Regional Director Ro-ann Bacal – mga vice chairperson ag DOLE 6 Regional Director Ponciano M. Ligutom, CESO III, Chairperson it Regional Tripartite Wages and Productivity Board. (JSC/VGV-PIA 6 Aklan)