Aklanon news: Populasyon it Aklan nag-abot sa 535,725

By Venus G. Villanueva

Tuesday 15th of May 2012

KALIBO, Aklan (PIA) -- Ro populasyon it Aklan, base sa resulta it 2010 Census of Population and Hoosing, hay nag-abot sa 535,725, suno sa lista nga ginpaguwa kurundaya eamang it National Statistics Office (NSO).

Ro makaron nga populasyon it Aklan hay nagpakita nga nagdugang ro mga pumueuyo it 84,411 sa ana kara nga populasyon ku 2000 nga may 451,314, base sa listahan it NSO, nga may pagtubo kada dag-on nga 1.73 porsiyento.

Suno sa NSO, nagakahueugan ra nga daywang ka tawo ro nagadugang kada dag-on sa kada 100 nga tawo sa populasyon.

Sa 17 nga mga banwa it Aklan nga may kabilugan nga 327 nga mga barangay, ro banwa it Malay ro pinakamadasig sa pagtubo it populasyon sa 6.45 porsiyento.

Raya, suno sa NSO, hay ap-at nga beses sa kadasig it bilog nga probinsya ag limang (5) beses nga mas madasig sa ana ku rehiyon nga 1.35 porsiyento.

Ro pagdasig sa populasyon sa Malay hay daea it pag-abu it naga-adto sa Malay bangud sa industriya it turismo sa Bary. Caticlan ag sa isla it Boracay, suno kay Blas Solidum, Provincial Statistics Officer it NSO-Aklan.

Nagsunod sa Malay sa pinakamadasig magtubo sa populasyon nga banwa hay ro Nabas, nga 2.18% ag New Washington, nga may 2.17 porsiyento.

Samtang, ro banwa it Malinao ro may pinakamahinay nga pagtubo sa populasyon nga may 0.17%; Madalag, nga may 0.41 porsiyento ag Altavas, nga may 0.61 porsiyento. (JSC/VGV-PIA 6 Aklan)