Akeanon news: Sa Aklan, mas abu nga mga eapsag nga eaeaki ku sa babayi

Monday 16th of April 2012

KALIBO, Aklan, Abril 16 (PIA6) -- Nakasayud baea kamo nga sa Aklan, mas abu ro mga natawong eapsag nga eaeaki ku sa mga babayi?

Suno sa pinakaulihi nga impormasyon nga gintao it National Statistics Office (NSO) iya, sa 10,249 nga mga ha rehistro nga natawo ku 2011 sa probinsya, 5,378 ukon 52.47% kara ro mga eaeaki, samtang 4,871 ukon 47.53% ro mga babayi, nga nagapakita ro mga eaki ku nagtaliwan nga dag-on hay mas abu it 4.94% ukon 507 nga na rehistro.

Kaparehas man sa resulta sa kabilugan it probinsya, ro Kalibo hay nagpakita man nga sa mga rehistrado nga natawo ku 2011, mas abu man ro mga eaeaki nga nagsobra sa katunga.

Sa natawo nga 4,108 sa Kalibo, 2,199 kara ro mga eaeaki samtang 1,909 eamang ro mga babayi.

Suno sa NSO, raya hay mahimo bangud nga mas abu ro mga ospital sa Kalibo ngani mas abu ro naga unga sa Kalibo bisan sanda hay halin sa ibang lugar.

Ginsundan ro Kalibo it banwang Malay sa kaabuon it natawo nga may halisita nga 1,107, Ibajay nga may 748 ag New Washington nga may 530.

Ro Lezo ro may halista nga pinaka sangkiri, nga may una eamang nga 157 nga na rehistro nga natawo ku 2011.

Ginsundan ro Lezo it Numancia nga may halisita nga 218 ag Madalag ag Tangalan nga may pareho nga 238.

Tulay eamang ro nagaseparar sa Numancia sa Kalibo ag mahimo nga ro mga nanay hay mas naila mag-unga sa Kalibo ay abu nga ospital.

Kon sa buean man nga abu ro natatawo, nagpanguna ro Oktubre nga may 968 ag pinakanaba ro natawo ku Pebrero nga may 720.

Sa listahan man it NSO, ginpakita nga mas abu makaron nga mga nanay ro mas naila paungaon it doktor, nga haa atenderan ku 2011 ro 4,111 nga nag-unga, ag ginsundan ra it paltera, nga may ha asistihan nga 3,996%.

Ro mga midwife hay may ha asistihan nga 1,953 samtang ro mga nars hay may 123 nga haasisitihan.

Raya, suno sa NSO, hay nagapakita nga mas abu nga mga naganabdus ro gusto nga doktor ro magpaunga kanda para sa euwas nga pag-unga, samtang may naga pa asister gihapon sa hilot bangud mahimo nga sa kaeayuon, owa it makita nga doktor, ukon kueang sanda sa kwarta. (JSC/VGV-PIA 6 Aklan)