Aklanon News: Disenyo it pikamayad-ayad nga e-trike gina-usoy it DOE

By Venus G. Villanueva

Thursday 26th of January 2012

KALIBO, Aklan, Enero 26 (PIA6) -- Nagausoy makaron ro Department of Energy (DOE) it pinakamayad-ayad ag praktikal nga disenyo it electric tricycle (e-trike) nga paga adoptahon sa ulihi sa pag implementar kara it E-Trike Project it gobyerno.

Ro pag-usoy sa pinakamayad-ayad nga disenyo it e-trike hay ginlunsar it DOE paagi sa sangka paindis-indis (contest), kon siin ro maga entra hay dapat makapaguwa it 2D ag 3D nga drawing sa bulig it computer nga disenyo para sa pagahimuon nga e-trike nga magapakita man it modern nga inobasyon.

Ro e-trike nga iga disenyo hay dapat maka akomodar it an-um (6) nga mga pasahero euwas sa driver, ag may tatlo nga kariton.

Ro mga ehemplo kara, suno sa DOE, hay sarang matan-aw sa andang website nga www.doe.gov.ph.

Dugang pa gid it DOE, may mga makara eon nga mga e-trike nga habutang sa mga kabanwahunan nga makatao it ideya sa mga pumaeasakop sa contest.

Ginpadumdum man it DOE nga para sa contest, ro mga igasumiter nga mga disenyo hay dapat orihinal, bag-o ag owa gid hagamit para sa negosyo ukon pagdemonstrar.

Ro mga intresado nga mag-entra sa contest hay dapat mag “fill-up” it Official Registration Form. Raya hay pwede mabuoe paagi sa DOE website nga www.doe.gov.ph ukon sa website it Philippine Information Agency nga www.pia.gov.ph.

Ro iga sumiter nga “entry” hay dapat nakabutang sa CD ag “hardcopy” (A3 size) ag nakabutang sa sangka sirado nga sobre.

Dapat hay personal ra nga i- sumiter ukon ikapadaea ro mga entry kaibahan ro ha “fill-up” nga official registration form ag may ha notary nga Oath of Ownership indi mageampas it alas 4:00 it hapon it Febrero 17, 2012 sa Nationwide E-Trike Design Contest, c/o Energy Utilization Management Bureau, Department of Energy, Merritt Road, Fort Bonifacio, Taguig City 1631.

Sangka entry eamang ro dapat ika sumitir it naga entra.

Napueo ro pagapilion nga magadaog kon siin ro tatlo kara hay pareho nga magabaton it P200,000.00 samtang ro pito (7) hay magabaton it consolation prizes nga P50,000.00 kada ieaea.

Ro mga gindisenyo it nagpanguna nga tatlong nagdaog hay posible nga paga adoptaron it DOE sa andang E-Trike Project. (JSC/VGV-PIA 6 Aklan)