Hiligaynon news: CSC nagpanawagan sa mga Ilonggo nga empleyado sa gobyerno nga buhion ang pagkabaganihan

By Lilibeth A. French

Tuesday 4th of September 2012

SYUDAD SANG ILOILO, Set 4 (PIA) -- Si Civil Service Commission 6 Director Rodolfo Encajonado naghambal sa mga nasyonal kag lokal nga opisyal kag empleyado sang gobyerno sa sining syudad nga may yara sang pagkabaganihan sa ila kag ang kinahanglan gid lamang nila amo nga buhion ini kag himuon nga talaksan sang ila pagpangabuhi partikular sa pagserbe sa tawo.

“Matuod, madamo ang ginapaabot sa aton kag sa nasiling na ni Reverend Fr. Joel Eslabra sang damlag nga isa ka sakripisyo apang subong man isa ka prebelihiyo nga magserbe sa mga tawo sa pungsod (Indeed, much is expected of us and as what Reverend Fr. Joel Eslabra earlier said it is a sacrifice but at the same time a privilege to serve people in our country),” siling ni Encajonado sa tion sang pangbukas nga programa para sa selebrasyon sang ika -112 nga anibersaryo sang Philippine Civil Service nga may tema "Kawani, Ikaw ay Isang Lingkod Bayani."

Ang pangbukas nga programa gin-unahan sang isa ka Misa sang Pagpasalamat nga ginpangunahan ni Fr. Eslabra kag pagpataas sang hayahay nga ginhiwat sa Iloilo Provincial Capitol, Septyembre 3.

Si Encajonado nagpahanumdom sa iya mga kasubong nga mga empleyado sang gobyerno nga sang ila gin-asumir ang katungdanan kag responsibilidad sang ila posisyon indi ang mga tawo ang naghinyo nga ibutang sila sa yadtong mga posisyon apang sila nga nagbaton sang sining responsibilidad.

Suno kay Encajonado sila ang dapat magsunod sa ginasaad sang laye nga ila mainalagdon nga tumanon ang katungdanan kag responsibilidad sang ila posisyon.

Ginhatagan pagtamod ni Encajonado nga sa Rehiyon 6, partikular sa syudad sang Iloilo wala sang ginatawag nga mga dalagku nga kaso nga mabatian batuk sa mga opisyal kag empleyado sang gobyerno. Tigaylo, ang record nagapakita nga sang nagliligad nga mga tinuig may mga tawo sa gobyerno nga ginkilala bilang outstanding nga mga opisyal kag empleyado.

Suno kay Encajonado sang nagligad nga tuig may yara sang 20 ka mga nominado kag sa karon nga tuig mga 30 ang nominado para sa Honor Awards Program sang Komisyon. Ang inisyal nga mga pagpalayag nagpahayag nga sa 30 ka mga nominasyon, 5 ang nakapasar sa semi finals round kag 2 ang gindeklarar nga tagdaug.

“Ini nagapakita nga ang mga Ilonggo masaligan kag madamo sa aton ang may kinaiya sang Lingkod Bayani (This shows that Ilonggos can be depended upon and many of us here have the traits of a Lingkod Bayani),” siling ni Encajonado, nga nagdugang nga “sa aton tanan, bisan wala kita ginkilala bilang Lingkod Bayani sang mga prestihoso nga mga organisasyon aton padayunon bangud ang aton Big Boss sa ibabaw kag ginahambal pagkatapos naton maserbehan ang aton termino diri sa kalibutan kita ang gina-require man sa pag-account sini (to all of us, even if we are not recognized as Lingkod Bayani by prestigious organizations we should continue to do so because our Big Boss is up there and they say, after we serve our term here on earth we are required to account for it.”

Ang mga opisyal kag empleyado sang gobyerno ang nag-recite man sang Panunumpa sa Watawat ng Pilipinas kag Panunumpa ng Kawani ng Gobyerno nga ginpangunahan ni Bureau of Jail Management and Penology Director Sr. Supt. Ignacio Panti kag Department of Education 6 Assistant Director Corazon Brown pagkatapos sang flag raising. (JSC/LAF-PIA6 Iloilo)