Hiligaynon news: ‘Gener,’ nagtuga halit sa propyedad, kabuhi sa KN

By Lilibeth A. French

Saturday 4th of August 2012

SYUDAD SANG ILOILO, Agosto 4 (PIA) -- Ang nabagatnan-nakatungdan nga habagat (southwest monsoon) nga ginpabaskog pa gid ni bagyo “Gener” kag nagtener sa Kabisayaan Nakatungdan tubtub sang Huwebes nagresulta sa pagbaha, pagkatiphag, kamatayon kag paghalin sa ila puluy-an sang linibo ka mga pamilya sa rehiyon.

Sa iya 12 p.m. nga update sang Agosto 2, ang Regional Disaster Risk Reduction and Management Council (RDRRMC-6) nagpalayag nga ang pagbaha nag-apekto sang 89 ka mga barangay sa probinsiya sang Negros Occidental, Iloilo, Antique kag Aklan kag sa syudad sang Iloilo.

Ang RDRRMC-6 report nag-isip nga kapin sa 3,394 ka mga pamilya ukon 14, 708 ka mga persona ang naapektuhan sa rehiyon. Kalabanan sang mga naapektuhan nga pamilya ang halin sa Negros Occidental nga may 2,281.

Ang update nagapakita man nga 25 ka mga pamilya sa Brgy. Poblacion, Valladolid sa Negros Occidental kag 36 ka pamilya sa Kalibo ang sa evacuation center.

Ang mga balay nga nagkalaguba nagdangat sa 1,823 sa diin ang 190 nabalhag totally damaged kag 1,633 partially damaged.

Ang RDRRMC-6 nakabalhag man sang 3 ka patay, kag 9 ka persona nga napilasan. Duha sang mga napatay ang napilipilan sang natumba nga kahoy kag ang isa ang nalumos.

Apang ang mga balita sa radyo nagpahayag nga ang lawas sang 19 anyos nga si Alfred Gumban sang Brgy. Balabag, Pavia, Iloilo nga ginbalita missing matapos nga nalumos sa suba sang Aganan River sang Hulyo 31 ang nabawi sa Guimaras Strait sini nga aga.

Naapektuhan man ang 25 ektaryas nga kaumhan kag nanari-sari nga kahoy sa Sitio Panaitan, Barangay Cunsad sa Alimodian, Iloilo tuga man sang pagkatiphag ukon landslide nga nagluntad sa bakolod nga bahin sang Sitio Panaitan sang Hulyo 31.

Ang shoreline protection sa Brgy. Rizal-Tuguisan in Guimbal, Iloilo ang ginpalayag nga nahalitan man tuga sang mga dalagko nga balod samtang ang soil erosion nga nagluntad sa baybayon nga lugar sang banwa nagtuga sang halit ginabulubanta nagdangat sa P2,000,000.

Ang RDRRMC-6 sa karon ang padayon nga nagamonitor sang halit ni bagyo “Gener” samtang padayon ini nga nagakoordinar sa mga apektado nga lokal nga panguluhan pinaagi sa ila DRRMCs nga nagahimo man sang nagakaigo nga relief assistance kag interbensyon sa ila natungdan nga mga lugar.

Ang Malakanyang report napetsahan Agosto 2 nagsiling nga kapin sa P1.530 milyon nga balor sang bulig ang nahatag na sa nagkalainlain nga rehiyon sang pungsod apektado ni bagyo “Gener” bilang kabahin sang padayon sini nga contingency efforts sa mga biktima sang bagyo. (JCM/LAF-PIA6)