Hiligaynon news: Punong Barangay nagpasalamat sa Bise Presidente sa bulig sa pagpakig-away batuk sa dengue

By Lilibeth A. French

Saturday 16th of June 2012

SYUDAD SANG ILOILO, Hunyo 16 (PIA) -- Ang barangay kapitan sang Brgy. Calumpang, Molo ang nagpasalamat sa talatapan ni Bise-Presidente Jejomar Binay sa bulig sini sa ila mga pagpanikasog sa pagpakig-away sa nagasaka nga kaso sang dengue sa ila lugar.

Si Barangay Captain Roberto Niño nagpabutyag sang iya pagpasalamat sa tion sang paghinun-anon sa mga katapu sang media bag-o ang pag-abot sang Bise Presidente.

Si Binay ang nagpakigkita sa mga benepisyaryo kag doctor sang medical mission nga gin-organisar sang Office of the Vice President kag ginhiwat sa gym sang amo nga barangay.

Suno kay Niño, ang Calumpang isa sa duha ka mga barangay sa syudad nga benepisyaryo sang medical mission kag mist spraying nga ginapatigayon sang OVP upod ang Alpha Phi Omega (APO) fraternity kag Manila Pest Control (MAPECON) bilang kabahin sang ila mga kampanya kontra sa dengue.

Sa hinun-anon upod sa media, si Binay nagsiling nga ang mga doctor volunteer sa medical mission ang kalabanan katapu sang APO kon sa diin isa siya ka miyembro.

Sumugod sang Enero tubtub Hunyo 13, si Nino nagsiling nga ang barangay nakabalhag sang total nga 37 sang kaso sang dengue. Ini ang ikaduha na sa karon sa kapin sa 180 ka mga barangay nga may madamo nga nabalhag sang kaso sang dengue.

Bilang kabahin sang ila preventive measures, si Niño nagsiling nga ila na ginreplikar ang Executive Order No. 011 nga ginpaguwa ni Mayor Jed Patrick Mabilog nga nagamando sa mga opisyal sang barangay sa pag-obserbar sang "4 o’ clock habit" sa ila natungdan nga mga lugar.

Suno pa kay Niño iya man ginpalambot sa Bise Presidente sa iya pagbisita ang concern sang 64 ka mga pamilya sa barangay nga maapektuhan sang Batiano River Rehabilitation Project kag ang resolusyon sang barangay nga nagahinyo sang suporta para sa isa ka youth center.

Si Vice President Binay amo man ang Chairman sang Housing and Urban Development Coordinating Council. (JSC/LAF-PIA6, Iloilo)