Hiligaynon news: PNoy nanami-an sang ginpahamtang nga mga kaayuhan sa Iloilo River

Friday 8th of June 2012

ILOILO CITY, June 8 (PIA) -- Ginpabutyag ni Presidente Benigno S. Aquino III ang iya pagkalipay sa mga kaayuhan nga ginpahamtang para maproteheran kag mapabalik sa iya kabuhi ang suba sang Iloilo.

Ini ang impresyon ni Presidente Aquino nga ginpaabot sa media ni Senator Franklin Drilon, kasunod sang iya paginspeksyon sa porsyon sang 1.2 kilometer nga Iloilo River Esplanade.

Si Presidente Aquino nagbisita sa Syudad sang was in Iloilo bilang dinapait nga tagpamulongpulong sa First Philippine International River Summit, pag-inspeksyon sa mga ginapatigayon nga mga proyekto pang-imprastraktura sa Syudad kag sa pagpanagtag sang PhilHealth cards kag land certificates sa mga imol nga mga benipisyaryo sa Syudad.

Ang River Summit ginhiwat sadtong Mayo 30 tubtob Hunyo 1 gintambungan sang 1,200 ka mga eksperto sa patag sang river management, aquatic biodiversity, kag global climate change gikan sa U.S.A., Canada, Korea, Japan, Vietnam, Philippines kag iban nga mga pungsod sa Asya, nga kon sa diin nagtipon sila sa Syudad sang Iloilo para ipabati kag ipaambit ang ila mga eksperyensya nga pwede mahimo sa iban nga mga syudad.

Ang summit nga mga tema “My River, My Life,” kabahin sang mga pagpaninguha sang gobyerno nga madumalahan sang maayo ang mga kasubaan sa bilog nga pungsod.

Sa Iloilo River Esplanade, Gintagaan ni Senator Drilon si Presidente Aquino sang mga ihibalo angut sa nanuhaytuhay nga mga hilikuton katulad sang pag kali ukon pagkuha sang mga lay-on (dredging) tubtob sa konstruksyon sang mga nauhaytuhay nga mga support structures para mapabalik ang kabuhi sang suba.

Suno sa Ilonggo nga Senador ginhambal sang Presidente nga ang proyekto mayo gid para sa industriya sa turismo kag ginalauman sang Presidente nga magabalik siya Iloilo City.

Sa ginhiwat nga media interview, ginpabutyag ni Drilon ang iya pagpaninguha para mapabalik ang kalidad sang tubig sang suba kag i-relocate ukon saylohon ang mga tao nga nagapuyo sa delikado nga bahin sang suba, sa iban nga lugar.

Ginsiling ni Drilon nga komitido ang Presidente sa paghatag dugang nga pundu kon may yara pa nga dugang nga pagkinahanglan para sa housing units sang mga informal settlers.

Nalipay man siya sang ginpanginbulahan kag gindayaw ni Presidente Aquino ang mga lederes sang Iloilo sa ila pagpasanyog sang kabuhi sang mga Ilonggo kag pagpaluntad sang consciousness bahin sa environmental protection.(JCM/VWV-PIA 6 Iloilo)