Hiligaynon news: Ginpasanagan sang DAR 6 ang mga Ilonggos bahin sa pagpanagtag sang duta sa Hacienda Luisita

Friday 1st of June 2012

SYUDAD SANG ILOILO, June 1 (PIA) -- Ang Department of Agrarian Reform (DAR), Region 6 nagpatigayon sang pagpasanag sang mga isyu may kaangtanan sa pagpanagtag sang mga kadutaan sa Hacienda Luisita, kag agud matun-an man ang mga lihok sang DAR, Region 3.

Ang pagpatigayon sang briefing sa Iloilo media ginpangunahan ni DAR 6 Director Alexis Arsenal agud mahangpan ang April 24 nga desisyon sang Supreme Court bahin sa Hacienda Luisita nga ginapanag-iyahan sang Cojuangco family ni President Benigno S. Aquino III.

Ginpresentar ni DAR 6 Assistant Regional Director for Operations Felicidad Banares ang mga nabulig sang DAR sa pag-implementar sang mga hilikuton nga nabase sa nangin desisyon sang Supreme Court, kag nagalaum siya nga makabulig ang media sa pag-paathag sa publiko.

Suno kay Banares nga mabudlay gid ang trabaho sang DAR Region bangud kay nagadamo sang 4,335 hectares kag 6,296 ang mga farm-worker-beneficiaries.

Gindugang sa pagpabutyag ni Banares nga gintipon ni Secretary Virgilio delos Reyes ang 180 ka mga personnel sang DAR nga nagikan sa mga nanuhaytuhay nga mga provincial offices sang DAR Region 3 para sa pagpatigayon sang lapnagon nga information campaign para sa mga mangunguama kag mga benipisyaryo, bahin sa mga tikang nga pagapatigayunon para sa mga kwalipikado nga makaangkon sang farmlots ukon mga ulumhan sa munisipalidad sang Tarlac, Concepcion kag La Paz.

Ang iban nga mga hilikuton ginlakipan sang research works, coordination meetings sa mga partner agencies - Land Bank of the Philippines, Department of Environment, ROD, farmer leaders, barangay local government units, kag mga meetings sa mga agrarian reform officials.

Suno kay Banares ang Rehiyon 6 may 13 ka “Haciendas” nga nalakip sa land distribution program.

Sa sini nga numero, dose (12) ka mga ‘haciendas’ ang yara sa Munisipalidad sang E.B. Magalona, La Carlota City, San Carlos City kag Calatrava probinsya sang Negros Occidental; kag isa sa probinsya sang Iloilo.

Hambal ni Banares nga kulang ang tao sang DAR kag ila nga sundon ang mga ginpatigayon sang Region 3 nga pamaagi para sa maayo nga serbisyo.

Suno sa iya ang Rehiyon 6 may 172,000 hectares nga inugpanagtag nga mga duta kag nagalaum nga ang pagpanagtag sang duta sa rehiyon makompleto sa tuig 2014.

Sa 172,000 hectares, ang DAR 6 nakatigayon nga maka- accomplish nga ma-panagtag ang 4,600 hectares sang nagligad nga tuig, kag para sa karon nga tuig ginatarget nga i-distribute ang kalaparon nga 46,000 ka ektarya.

Ang DAR 6 Assistant Regional Director for Operations nagsiling nga 72 porsyento sang 46,000 hectares ang yara nahamtang sa Negros Occidental.(JSC/VWV-PIA 6 Iloilo)