Hiligaynon News: 21 ka mga aplikante ang gilayon nabaton sa BPO job fair

By Vicente W. Villavert

Friday 4th of May 2012

SANG ILOILO, May 4 (PIA 6) -- Duha ka napulo kag isa (21) ka mga aplikante ang mapalaron nga mabaton nga maka-obra gilayon (hired on the spot) sa mga call centers ukon mga Business Process Outsourcing (BPO) companies kasunod sang ginpatigayon nga Labor Day Job and Livelihood Fairs nga ginhiwat sa Amigo Plaza Mall, sini nga Syudad.

Ginsiling ni Nancy Yee, Labor Employment Officer II sang Department of Labor and Employment Iloilo-Guimaras Field Office, kag isa sa mga katapo sang DOLE 6 Secretariat sa Jobs Fair Amigo Plaza Mall nga ang 21 ka mga aplikante ang nagikan sa 924 ka mga jobseekers nga nagpasakop sa Labor Day event.

Sa interview sang PIA ginpabutyag ni Yee nga sa 924 ka mga jobseekers ukon mga aplikante, mga 369 ang kalalakihan samtang 555 ang kababaehan kag sobra sa isa ka libo ka mga registration forms ang na-isyu apang 924 ka pormas lamang ang nakabalik, gani nga ginhaum-haum na lang nga basi ang iban nga mga aplikante nga pagkahibalo nga naperteneser lamang para sa call centers and job fair sa Amigo Plaza Mall, kabangdanan nga ang iban nga mga aplikante mahimo nagkaladto sa SM City Iloilo nga kon sa diin yara ang recruitment para sa lokal kag overseas nga ulobrahan.

Ginpabutyag man ni Yee nga maglowas sa 21 ka mga “hired on the spot” may yara man 95 ka mga jobseekers ukon aplikante nga “near hired” ukon mga jobseekers nga nakapasar sa pre-qualification screening apang nagakinahanglan pa sang ginatawag “improvements”.

“Sila pagahanason para maimprobar ang ila conversation skills ukon mapaayo ang ila pagkasampaton sa patag sang konbersasyon, kag dako ang posibilidad nga ma-hire sila ukon mabaton sa trabaho kon may ginpakita sila nga improvements sa ila kaugalingon”, hambal ni Yee.

Sa ginpahayag ni Assistant Regional Director Dax B. Villaruel sang Department of Labor and Employment (DOLE 6) sa interview sang PIA, may siyam (9) ka mga Call Centers ang nagpasakop sa Job Fair sa Amigo Plaza Mall nga eksklusibo lamang para sa mga aplikante para sa call centers.

Si Mr. Johnson Lim sang Philippine Chamber of Commerce and Industry-Iloilo nag acknowledged sa pagpasakop sang 114 ka private companies nga nagtanyag sang nanuhaytuhay nga sahi sang mga trabaho sa wala pa sang trabaho nga sektor sang sosyedad.
.
“Nagapati kita nga ang sabat sa paghagan-hagan sang epekto sang kaimulon amo ang paghatag sang trabaho kag palangabuhian sa mga wala trabaho, kag pinaagi lamang sini nga mapataas naton ang sitwasyon sang ekonomiya, dira kag mapanubo naton kon indi gid man madula ang epekto sang krisis sa ekonomiya nga aton tanan ginapangatubang,” hambal ni Lim.

Magluwas sa jobs fair, Ang Philippine Army, Philippine Airforce, Philippine Navy nagpatigayon man sang libre nga medical, dental, free haircut services sa nahinambitan nga Mall samtang blood letting activity naman ang ginpatigayon sang Philippine Red Cross.

Suno sa report ni Labor and Employment Officer Gilberto P. Siaton, Jr. sang DOLE 6 Secretariat incharge para sa medical/dental services, nagdamo sang 109 ka tao ang naka-avail sang medical services; 73 sa dental; 50 sa free haircut; 46 para sa libre nga masahe, samtang 12 ang nagdonar sang ila dugo sa Red Cross.(JSC/VWV-PIA6 Iloilo)