Hiligaynon news: Scholarship grant sa Japan ginpaalinton sang DOST

By Jaime S. Cabag, Jr.

Friday 3rd of August 2012

MANILA, Agosto 3 (PIA) -- Ang Department of Science and Technology (DOST) ang nagapang-agda sa mga manogpanalawsaw ukon researchers gikan sa mga kolehiyo, unibersidad kag institusyon sang research sa Pilipinas sa pag-aplay para sa isa ka scholarship grant agud nga makakuha sang Ph.D. nga grado ukon degree sa Japan paagi sa 2013 RONPAKU (Dissertation, Ph.D.) Program nga ginatanyag sang Japan Society for the Promotion of Science (JSPS).

Ang JSPS RONPAKU (Disseration, Ph.D.) Program ang nagahatag sang tutorial kag pinansyal nga suporta sa may potensyal nga mga manogpanalawsaw gikan sa Asia kag Africa, nga gusto makakuha sang ila Ph.D. nga grado sa mga unibersidad sa Japan paagi sa pagsumiter sang isa ka dissertation nga wala na sang bayaran sa isa ka pang-Ph.D. nga kurso.

Ang mga kurso nga sakup sang scholarship grant amo ang humanities, social sciences kag natural sciences. Ini nga programa ang ginatanyag sa mga Pilipino santo sa kasugtanan sa tunga sang DOST kag JSPS kaangot sa internasyonal nga pagpakigbuyloganay sa bahin sang siyensya nga ginlagdaan sadtong Marso 23, 2004.

Agud nga maka-qualify sa nasambit nga programa, ang mga aplikante nga Pilipino dapat isa ka manogpanalawsaw nga: 1) wala makakuha sang Ph.D. degree gikan sa isa ka unibersidad; 2) gusto magkuha sang Ph.D. degree gikan sa unibersidad nga Hapon paagi sa pagsumiter sang isa ka dissertation; 3) nakapatigayon sang masustansya nga mga resulta sa pagpanalawsaw sa iya linya sang pagtuon, rason nga paagi sa paghimo sang dissertation sa idalum sang program ang madinalag-on nga makakuha sang Ph.D. degree; 4) full time nga nagatrabaho sa isa ka unibersidad ukon research institution sa Pilipinas, ukon mahimo nga mabotang sa amo nga obra sa pag-abot sang Abril 1, 2013; 5) nagapang-edaron sang 45 ka tuig ukon mas bata pa sa Abril 1, 2013; kag 6) ginrekomendar sang DOST.

Ang mga makaagum sang sini nga iskolarsyip, nga pagatawgon nga RONPAKU fellows, ang dapat maghimo sang ila dissertation research sa Japan. Sila ang pagapahanugutan nga magbisita sa Japan kag ginapaabot nga makumpleto ang ila Ph.D. nga mga grado sa sulod sang indi maglapaw sa 3 ka tuig.

Ang ila pagpanalawsaw ang pagahimuon sa idalum sang superbisyon sang isa ka Hapones nga advisor nga, kon kinahanglan, ang magbisita sa Pilipinas agud hatagan sang superbisyon ang ginahimo sang RONPAKU fellow kaupod ang mga advisor nga Pilipino.

Ang mga aplikasyon ang dapat isumite sa JSPS nga indi maglapaw sa Agosto 24, 2013. Ang iban nga mga detalye tuhoy sa sini nga programa kalakip ang kon paano isumite ang mga aplikasyon ang sarang makuha sa website sang DOST sa www.dost.gov.ph (DOST/JCM/JSC-PIA6)