Hiligaynon news: VP Binay nagpasalig sa mga Hapones nga libre sa korapsyon ang pagnegosyo sa PHL

Wednesday 18th of July 2012

MANILA, Hulyo 18 (PIA) -- Ginpasalig ni Bise Presidente Jejomar Binay ang mga negosyante nga Hapones nga pwede na sila makapamuhunan sa Pilipinas nga wala sang dapat kabalak-an tuhoy sa korapsyon sa gobyerno.

Santo sa isa ka balita gikan sa talatapan sang ika-duha nga pinakamataas nga opisyal sang pungsod, ang pasalig ang ginhimo ni Binay sa tion sang magpakigsapul ini kaupod kay Japan Deputy Prime Minister Katsuya Okada sa Prime Minister’s Office sa Tokyo.

Madumduman nga si Binay ang nagtulak padulong sa Japan agud maghatag sang “keynote message” sa ginhiwat sini nga semana nga “Secure Asia 2012” nga konperensya tuhoy sa cybersecurity sa nasambit nga pungsod.
Siya ang gin-updan ni Philippine Ambassador Manolo Lopez kag duha ka mga adviser sa “international relations” gikan sa talatapan sang Bise Presidente.

Sa iya nga bahin, ginsiling ni Okada nga ang nagapadayon nga mga paghimud-os sang Pilipinas sa pagsumpo sa korapsyon ang isa ka maayo nga insentibo para sa mga manug pamuhunan ukon investors. Nagapati si Okada nga ang mga negosyante nga Hapones ang dapat maghatag sang mas daku nga pagtamod sa Pilipinas bilang alternatibo nga duog nga pahamtangan sang puhunan luas sa China, Thailand, Vietnam kag Indonesia.

Ginhambalan ni Binay si Okada nga may yara sang madamo nga mga oportunidad nga nagahulat sa mga negosyante nga Hapones sa Pilipinas, labi na sa bahin sang mga proyekto kaangot sa enerhiya kag turismo.

Si Okada ang nagpanugyan para sa dugang nga mga “high-level political exchanges” sa tunga sang duha ka mga pungsod sa tuyo nga labi nga mapabaskug ang relasyonsa bahin sang ekonomiya kag nesgoyo katulad sang ila ginhimo kaupod sa iban nga mga pungsod sa Southeast Asia kalakip ang Vietnam kag Indonesia.

Nagpasalamatay man ang duha ka mga opisyales para sa maayo kag mapag-on nga mga relasyon nga nagapatunga sa Pilipinas kag Japan sa bahin sang Overseas Filipino Workers kag Official Development Assistance (ODA).

Ginpasalig ni Okada si Binay nga ang Japan ang padayon nga maga usar sang ila ODA agud nga suportahon ang programa sang administrasyon ni Pangulong Aquino tuhoy sapagpasanyog sang “inclusive growth.”

Siya ang nagpabutyag man sang masanag nga panan-awan kon sa diin ang Association of Southeast Asian Nations (ASEAN) ang padayon nga maga diskusyon sang isyu sang matawhay nga pag nabigar sa West Philippine Sea sa mga miembro sang hubon kag sa tunga sini kag China.

Ginlaragway ni Binay ang iya pagpakigsapul kay Okada nga “warm, friendly and most productive.” (JCM/JSC-PIA6)