Hiligaynon news: Mga aplikasyon para sa mga tiglawas sang CSO/PS sa DRRM padayon nga ginabaton

SYUDAD SANG ILOILO, Mayo 28 (PIA) -- Ginpaalinton sang Office of Civil Defense (OCD) regional office diri nga padayon sila nga nagapamaton sang mga aplikasyon para sa luyag mag-entra bilang mga tiglawas sang Civil Society Organizations ukon Private Sector sa mga Disaster Risk Reduction and Management Councils (DRRM).

Tinutuyo sang paalinton gikan sa OCD nga mahatagan sang nagakaigo nga panahon ang mga interesado nga mangin katapu sang konseho nga maghanda kag magsumiter sang mga papeles kag iban nga mga rekisitos para sa ila aplikasyon.

Ginpaathag ni Office of Civil Defense (OCD) Regional Director Rosario Cabrera, nga nagapungko man bilang pinuno sang Regional Disaster Risk Reduction and Management Council (RDRRMC), nga ang pagpungko sang mga tiglawas gikan sa CSO ukon PS ang ginamandu sa idalum sang kasuguan nga amo ang Philippine Disaster Risk Reduction and Management Act of 2010.

Ini ang santo man sa particular nga katuyuan sang kasuguan nga kuhaon ang pagpakigbuylog sang mga CSO ukon PS kag pagpahatag sa ila sang kahigayunan nga makahimo sang ila kontribusyon sa pagpahaganhagan sang risgo kag pag-atobang sang mga kalamkidad santo sa ila igkasarang.

Nagalab-ot tubtub sa apat ang numero sang sini nga mga tiglawas nga sarang makasulod sa DRRM, sa nasyonal man ukon sa local nga lebel.

Ang mga interesado nga hubonang ginapanugyanan nga magsumiter sang isa Letter of Intent sa pinuno sang DRRM nga ila gusto entrahan, lakip ang kinahanglanon nga mga papeles.

Ang talatapan sang OCD ang bukas nga magbulig sa mga hubon nga gusto magsulod sa DRRM labi na para sa dugang nga impormasyon tuhoy sa sini nga bagay. (JCM/JSC-PIA6)

Number of Comments: 0

  

  

• Notices
• PCDSPO
• Speeches

News from the Regions

PIA eMagazines