Hiligaynon news: Pilipinas handa na sa mga baha -- DILG

Thursday 9th of August 2012

MANILA, Agosto 9 (PIA) -- Si Interior kag Local Government Secretary Jesse Robredo nagsiling sang Miyerkoles nga ang pungsod subong mas preparado na sa mga baha kag iban pa nga mga kalamidad bangud sang nag-ayo nga kapabilidad sang mga gobyerno lokal sa pagpreparar kag sa pag-upang sa mga kalamidad.

Sa isa ka programa sa telebisyon, si Robredo nagsiling nga ang gobyerno lokal halin sa probinsya tubtub sa lebel sang barangay, subong mas preparado na sa mga baha bangud sa padayon nga paghasa, mas maayo nga mga gamit kag koordinasyon.

Sa kabilugan, ang aton mga LGUs mas may kina-adman kag kapasidad sa pag-atubang sang mga kalimidad kung ikumparar sang una suno kay Robredo.

Ugaling, nagsiling ang DILG Secretary nga ang panghangkat indi lang sa ihibalo teknikal sang mga LGUS, kundi sa mas maayo nga koordinasyon sa ila mga pumoluyo.

Si Robredo nagpahayag nga ang gobyerno nagahimo sang iya bahin sa pagpreparar sa mga kalamidad kag ang publiko dapat maghimo man sang ila bahin. Dugang ni Robredo nga ang una nga bahin sang trabaho ara gid pirmi sa gobyerno kag ang pihak nga bahin ara sa mga pumoluyo.

Si Robredo nagsiling man nga sa subong mas may maayo nga koordinasyon, kooperasyon kag suporta gikan sa mga ahensya sang gobyerno kag sa indi gobyerno.

Gintudlo niya ang Asosasyon sang mga Fire volunteers, probinsya sang Quezon kag DILG Region 2 nga wala maigo sang ulan halin sa habagat kag nagbulig sa mga operasyon sa pagsalbar ukon naghatag sang bulig sa mga probinsya nga masyado gid nga na-apektuhan sang mga baha.

Sa sini nga mga panahon, gina-abi-abi gid ang suporta nga ginatanyag sang pribado nga sektor kag iban nga mga LGUs nga handa gid sa pagbulig sa mga biktima.

Subong man si Robredo nagdayaw sang pagpaninguha sang mga emergency responders, labi nagid ang Philippine National Police (PNP) kag ang Bureau of Fire Protection (BFP), nga nagtrabaho adlaw kag gab-i agud masalbar ang mga na-trap sa ila mga balay kag mga building bangud sa mabaskug nga ulan.

Onse ka mga tawo ang napatay, apat ang napilasan kag masobra sa 260,000 ka mga pamilya ang napuwersa sa paghalin sa ila mga balay samtang ang grabe ka baskug nga ulan nag tabon sa Manila kag malapit nga mga probinsya sang baha sa sulod sang pulo ka adlaw. Ang mabaskug nga ulan bangud sa habagat nagbubo sang mga 300mm (12 pulgadas) ukon tatlo ka beses sang sa average sa isa ka adlaw nga 80-100mm halin sang Lunes tubtub Martes nga amo ang pinakabaskug sa sulod sang tatlo ka tuig, suno sa PAG-ASA.(DILG/JCM/PIA6)