Hiligaynon news: Aquino naghingyo sa mga kabataan sa pagpartisipar sa pagtib-ong sang pungsod

By Atty. Ma. Janet C. Mesa

Friday 3rd of August 2012

MANILA, Agosto 3 (PIA) -- Si Presidente Benigno S. Aquino III naghingyo sa mga kabataan sa pagpartisipar sa pagtib-ong sang pungsod paagi sa pagpakita sang pagkalu-oy, ka-alwan kag pagtanyag sang ila bulig sa ila mga kaupod nga Pilipino agud mapabaskug ang progreso kag kauswagan sang pungsod.

Sa pagpasidungog sa Ten Outstanding Students of the Philippines (TOSP) sa Rizal Hall sang Malacañang, ang Presidente nangayo sa mga kabataan sa pagtanaw sa kaayuhan sang mga Pilipino agud maka-agum sang mas masanag nga pala-abuton.

Nagsiling si Aquino, nga ang mga ginpasidungan gintaga-an sang grasya sang Dios kag gintaga-an sang oportunidad. Ginpamangkot sang Presidente kung ano ang ila himu-on kag kung pakadto lang bala sila sa ila kaayuhan ukon ginatan-aw man nila ang kaayuhan sang iban.

Ang Presidente nagpasidungog sang 10 ka mga estudyante halin sa mga 30 ka mga finalists nga ginkilala sa ila academic kag professional nga kina-adman, sa ilang paging lider kag sang ila responsibilidad sosyal nga nasandig sa maayo nga mga moral values.

Ang TOSP 2012 awardees amo sanday Kenneth Isaiah Ibasco Abante halin sa Ateneo de Manila University, Angelita Adajar Bombarda sang De La Salle University, Jerome Ven David halin sa De La Salle University-Manila, John Michael Flores Dellariarte sang Ateneo de Zamboanga University, Daniel Philip Villaranda Dy sang Ateneo de Naga University, Jay-R Mesa Mendoza halin sa University of Rizal System-Morong Campus, Ruthell Angusto Moreno sang West Visayas State University, Maria Janua Bacolod Polinar sang Central Mindanao University, Kurt Gerrard Tiu See halin sa De La Salle University-Manila, kag Juan Carlo Pe Tejano halin sa University of the Philippines-Diliman.

Sa sini nga tuig may orihinal nga 243 ka mga nagpasakup nga ginsumitir para sa rehiyonal nga screening, 87 nga gin screen sang assembly agud magpili sang pinakataas nga 30 ka mga finalists.

Gin-abi-abi man sang Presidente ang tanan nga 30 ka mga finalists.

Ang TOSP padayun nga nagakilala sang mga pinakamaayo nga mga estudyante paagi sa RFM Foundation, Inc. upod sa kooperasyon sang Commission on Higher Education, National Bookstore kag iban pa.

Ang TOSP nasandig sa pagduso sang integridad, pagkahimpit, may kakulba sa Dios kag serbisyo bilang kabuhi agud makahimo sang mga lider nga may ikasarang. Ini gintukod sang Hunyo 19, 1961 sa selebrasyon sang centennial sang pagkatawo sang pungsodnun nga baganihan nga si Dr. Jose Rizal, sang negosyante nga si Jose Concepcion Jr. (js/JCMPIA6)