Hiligaynon news: Dapat usisa-on gid sang maayo ang paghatag sang lisensya sa pagmina

By Atty. Ma. Janet C. Mesa

Tuesday 31st of July 2012

MANILA, Hulyo 30 (PIA) -- Ang Malacanang nagdagmit sang importansya sa pag-usisa gid sang maayo sang tanan nga aplikasyon sa lisensya sa pagmina bag-o itugotan ang maskin ano nga kompaniya sa pagsugod sang operasyon sa pagmina agud mapaseguro nga nagatuman sila sang mga regulasyon nga natalana sa bag-o nga polisia sa pagmina ni Presidente Aquino.

Sa isa ka press briefing sa Malacanang si Presidential Spokesperson Edwin Lacierda nagsiling nga ang bag-o nga polisia sa pagmina, nga ara sa Executive Order no. 79 nagatugot sa mas madamu nga pahunan nga magsulod apang ini nagakontrolar kung sa diin kag pila sang aton dunang manggad ang magamit.

Suno kay Lacierda nga ang administrasyon nagakilala sang mga pahunan gani dapat sa administrasyon nga itun-an ang mga isyu sa husto, labi nagid suno sa bag-o nga EO kag sa mga pahunan sa pagmina.

Si Executive Secretary Paquito N. Ochoa Jr. nagsiling nga ang bag-o nga direktiba sang Ehekutibo nga ginpirmahan sadtong Hulyo 6 nagatuyo sa pagsantu sa mga polisia sa pagmina kag sang mga regulasyon sa pungod kag maghimo sang mga manughampang sa industsriya sa pagmina nga mas hayag kag may salabton.

Ang direktiba ni Presidente Aquino’s nagakilala sang mga aplikasyon sa pagmina – sa kontrata, concession ukon sa kasugtanan, lakip na sa mga lugar sa National Tourism Development Plan,mga kritikal nga mga lugar kag sa eco-system sang mga isla, mga primero nga duta agrikultural nga nasakop sa RA 6657, mga strategic development zones sa agrikultura kag pala-isdaan, dalangpan sa mga isda kag sanktuaryo nga gin deklarar sang Department of Agriculture.

Ang pagmina wala ginatugotan sa mga lugar nga ginkilala na sa idalum sang mga naga-eksistir nga mga laye sa pagmina, mga lugar sa agrario kag mga ginaproteksyunan, kag ang nga lugar nga gindeterminar sang Department of Environment and natural Resources (DENR).

Ang mga kontrata, concessions kag mga kasugtanan nga gin-aprobahan bag-o ang pagpagwa sang direktiba magapabilin nga legal kung ang mga kompaniya magatuman, sang subong nga mga laye,mga tulomanun, mga regulasyon kag sang mga termino kag kondisyunes sa ginhatag nga lisensya. (rck/JCM-PIA6)