Hiligaynon news: Malacanang nagapa-abot nga ang China masugot sa ginkasugtan sang ASEAN

Thursday 12th of July 2012

MANILA, Hulyo 12 (PIA) -- Malacanang nagsiling nga sila nagapa-abot nga ang People's Republic of China masugot sa bag-o nga ginkasugtan sang Association of Southeast Asian Nations (ASEAN) nga ang United Nations maritime convention amo ang basehan sa paghusay sang mga nakalain-lain nga nagasiling nga sa ila ang West Philippine Sea.

Ang mga ASEAN foreign ministers, nga nagsinapul sa Cambodia sa sini nga semana naghisugot sa ginaproponir nga dokumento para sa malinong nga paghusay sa gina-awayan nga teritoryo.

Ang China may posisyon nga ini dapat husayon sa malinong nga paagi kag ang tanan nagasugot sini suno sa kay Deputy Presidential spokesperson Abigail Valte sa isa ka regular nga press briefing sa Malacanang.

Si Valte nagsiling nga sila naga-tuyo nga ang draft mapagwa sa Nobyembre kag ini masulhay nga mabaton.

Si Valte nagliwat sang posisyon sang pungsod nga nagaduso sa Asean centrality kag ang code dapat mahimo bag-o ang iban nga mga partido imbitaron sa pag-entra sa Code of Conduct.

Sang ginpamangkot si Valte kung ang Palasyo nagapati nga ang Code of Conduct magatib-ong sang posisyon sang Pilipinas sa West Philippine Sea si Valte nagsiling nga mapag-on ang pag-angkon sang Pilipinas nga gina-suporta sang pangkalibutan nga laye kag ang Pilipinas magapadayon sang ila pag-angkon base sa rules-based approach.

Ang ginaproponir nga dokumento naga outline sang rehiyonal posisyon sang block nga nagapanawagan sa tanan nga mga partido sa pag-resolbar sang inaway sa teritoryo suno sa pungsodnon nga laye, lakip na ang UN Convention on the Law of the Sea or UNCLOS.

Ang UNCLOS isa ka ipangkalibutan nga kasugtanan nga nagabutang sang limitasyon kung paano nga mga malapit nga pungsod dapat magkonsiderar sang ila ekslusibo nga economic zones. Ang China isa a ka nagpirma sa UNCLOS.

Sang ASEAN Summit sang Abril, ang Pilipinas nagsiling nga ang ASEAN dapat maghisugot anay sa tunga sang iya mga myembro sa ginaproponir nga draft sang Code of Conduct of Parties sa West Philippine Sea (South China Sea) bag-o masinapul upod sa China. Ang West Philippine Sea nga isyu dapat maresolbar sa malinong nga paagi kasunod sa pangkalibutan nga laye.

Ang Taiwan kag mga myembro sang ASEAN - Philippines, Vietnam, Brunei kag Malaysia tanan may claims sa West Philippine Sea. Ang gina-awayan nga teritoryo ara sa importante nga gina-agyan sang mga bapor kag ginapatihan nga mangaranon sa langis kag mga deposito sang gas. (AS/JCM/PCOO-PIA6)