Hiligaynon news: Aquino nagapanan-aw sang mas masanag nga pala-abuton sa agrikultura

Friday 6th of July 2012

MANILA, Hulyo 6 (PIA6) – Si Presidente Benigno S. Aquino III nagsiling nga ang sektor sang agrikultura may madamu nga nahimu-an sa sulod sang duha ka tuig kag siya naghingyo sa publiko nga padayunon ang pagsuporta sa mga reporma nga ginapatigayon sang iya administrasyon para sa benepisyo sang mga Pilipino kag sa pungsod.

Suno sa Presidente nga kung may sektor man nga epektibo sa iya krusada sa tuwid nga daan, ini amo ang sektor sa agrikultura, sa pagpanguna sang Department of Agriculture, sa pagpamulong-pulong sa Makina-Saka 2012 AgriMachinery Roadshow sa siyudad sang Pasay sadtong Huwebes.

Sa idalum sang administrasyon Aquino, ang gobyerno nagbuhin sang bugas nga ginabakal sa sagwa halin 1.3 metriko tonilada sa 850,000 metriko tonilada na lang suno sa Presidente kag nagdugang nga sa sini nga tuig, ang pungsod magabakal na lang sang 500,000 metriko tonilada para sa pagkinahanglan sang pungsod.

Ang DA nagapa-abot man sa pagpatigayon sang pagka-supisyente sa bugas sa madason nga tuig kag ang pungsod magasugod padala sang bugas sa iban nga pungsod labi nagid kung ang panahon indi maka-apekto sa produksyon sa madason nga tuig.

Ang gobyerno nagapahunan man sa sektor sang agrikultura nga magbuhin sang mga uyang. Sang isa ka tuig, ang gobyerno nagpain sang P1 ka bilyon agud magbakal sang 2,300 ka bilog nga mga postharvest nga mga makina kag iban pa nga mga gamit.

Sa sini nga tuig, ang gobyerno nagpasaka sang badyet sa P2.6 bilyon agud magbakal sang 7,000 ka mga makinaria sa uma nga igapanagtag sang mga organisasyon sang mga mangunguma kag sa lokal nga gobyerno sa bilog nga pungsod suno sa Presidente.
Ang gobyerno nagpahunan man sa sistema sang irigasyon sang pungsod agud mapaayo ang produksyon sang pagkaon.

Ginkilala man sang Presidente ang pagkinahanglan sang research kag development sa pungsod sa pagsiling nga ang mga state colleges kag mga unibersidad kag ang Department of Agriculture dapat mahimbon agud makabulig sa paghimo sang mga propesyonal sa agrikultura, mga mangunguma kag mga nagapatubo sa paggamit sang moderno nga teknolohiya kag mga bag-o nga metodo sa panguma.

Ang President naghingyo sa mga Pilipino nga pabaskugon ang espirito sa pagboluntaryo sang ila mga serbisyo agud mapabaskug ang ila upod nga mga Pilipino bangud sa kada liso sang reporma nga ginatanum subong, ini makabenepisyo sang mga Pilipino sa madasun nga henerasyon.

Nagtambong man sa selebrasyon amo sandayAgriculture Secretary Proceso Alcala, Science and Technology Secretary Mario Montejo, Cambodian Ambassador sa Pilipinas Hos Sereythonh, kag Palo, Leyte Mayor Matin Petilla. (as/JCM/PIA6)