Hiligaynon news: Palasyo magapalapad sang sakup sang CCT para mas epektibo batok sa kaimulon

Monday 2nd of July 2012

MANILA, Hulyo 2 (PIA) –- Ang administrasyon Aquino nagaplano sa pagpalapad sang sakup conditional cash transfer (CCT) nga programa agud makabulig sa mga imul kag ma-agum ang malawig nga epekto sa away sang gobyerno batok sa kaimulon suno sa isa ka opisyal sang Palasyo.

Sa isa ka interbyu sa dzRB Radyo ng Bayan, si Deputy Presidential spokesperson Abigail Valte nangayo sa publiko nga taga-an pa sang diutay nga panahon ang programa sang CCT agud maka-epekto ang programa.

Ang gobyerno ginabasul sang mga kritiko nga indi maayo ang pag-atubang sang problema sang kaimulon wala sapayan nga agresibo nga pag-implementar sang programa sang CCT.

Sa sini nga tuig, si Valte nagsiling nga nga sila nagatinguha nga mas malapad pa ang isakup sang programa sa CCT halin 3.1 milyon ka mga pamilya nga mangin 3.8 milyon sa madasun nga tuig.

Ang panaka-ulihi nga mga pigura nagapakita nga ini masyado ka volatile sa malip-ot nga termino suno kay Valte kag sa duha ka tuig nga pagpungko ni PNoy indi guilayon mapapas ang kaimulon.

Ang duha ka tuig indi "long term," suno kay Valte nga nagsiling nga ang administrasyon may pagahimu-on nga pagkaayo sa pagpatigayon sang initiatibo batok sa kaimulon.

Ang mga pagtu-on nga ginahiwat sa random mga paagi wala nagasakup sang benepisaryo sang CCT suno kay Valte. May suhestiyon man si Valte nga kung ang mga spokesperson sang mga survey firms gusto gid matakos sang pagka-epektibo sang CCT batok sa pag-away sa kaimulon, dapat nila pamangkuton ang mga benepisaryo sang CCT.

Si Valte nagsiling man nga ang kampanya batok sa kaimulon indi lang tuhoy sa programa sang CCT kay may dugang nga mga programa nga suporta tulad sang paghanas sa palangitan-an, programa sa cash-for-work kag pabalay para sa mga imul.(a/s/JCM/Pia6)