Hiligaynon news: $1 Bilyon nga pautang sa IMF makabulig sa ekonomiya sang Europa

By Atty. Ma. Janet C. Mesa

Wednesday 27th of June 2012

MANILA, Hunyo 27 (PIA) -– Gin depensahan sang Malacañang ang desisyon sang Bangko Sentral ng Pilipinas sa pagpahulam sang $1-bilyon sa International Monetary Fund(IMF) nga magamit sini sa pautang sa mga pungsod, labi nagid sa Europa nga na-apektuhan sa pagnubo sang pangkalibutan nga ekonomiya.

Sa isa ka briefing sa Malacañang, si Presidential Spokesperson Edwin Lacierda nagsiling nga sa aton nga bentaha kung makabulig kita sa madamu nga mga overseas nga mga Pilipino nga nagatrabaho kag nagapuyo sa Europa.

Nagdugang siya sa pagsiling nga ang mga OFWs ang ma-apektuhan sang daku kung ang ekonomiya sang pungsod kung sa diin sila nagatrabaho kag nagapuyo padayun nga magnubo.

Mas bentaha sa aton sa pagproteksyon sa mga ekonomiya bangud may madamu kita nga mga Pilipino didto suno kay Lacierda.

Dapat tan-awon, siling ni Lacierda kung magpadayun panubo. Sa simple pa lang nga pagnubo sang dolyar sa pisos madamu nga ang nagakabalaka. Ano pa gid ayhan kung hinali lang nga madula ang OFWs naton sa Europa kag papauli-on sila tanan bangud wala na sang trabaho nga mahatag ang Espanya kag Italya.

Nagpaseguro si Lacierda sa mga Pilipino nga ang pautang indi usik sa kwarta apang paagi sa pagbulig sang isa ka pungsod nga nagakinahanglan.
Nagsiling si Lacierda nga wala naton gina-usikan ang kwarta. Ini isa ka pautang ka gang IMF magabayad sa aton sa ila utang. Indi lang sa kuwarta, apang ini magabulig sa aton bangud ini magabulig sa ekonomiya sang Europa. (rckJCM/PIA6))