Hiligaynon news: Aquino panguna nga manughambal sa sinapul sa public administration

By Atty. Ma. Janet C. Mesa

Wednesday 27th of June 2012

MANILA, Hunyo 27 (PIA6) -- Si Presidente Benigno S. Aquino III ang panguna nga manughambal sa sinapul sang public administration kag governance practioners sa EDSA Shangri-La Hotel sa siyudad sang Mandaluyong, Hunyo 27.

Ini nga pangkalibutan nga sinpaul sa public administration kag governance pagahiwaton sa pagkomemorar sa ika 60 nga anibersaryo sang University of the Philippinesz–National College of Public Administration and Governance (UP-NCPAG).

Ang tema sang sinapul sa subong nga tuig amo ang “Tradition and Transformation” nga nagatudlo sa importansya sa pagbalik sa mga panubli-on sa nagliligad, mga paghangkat sa subong kag sa hilimu-on sa pala-abuton para sa pagtuon kag sa kinagawi sang public administration kag governance.

Gintukod sadtong 1952 bilang Institute of Public Administration, ang UP-NCPAG nangin aktibo sa pagpauswag sang disiplina sang public administration sa Pilipinas, sa pagpabaskug sini bilang isa ka propesyon kag sa pagserbe bilang kritiko sosyal kag suporta sa gobyerno kag sa indi gobyerno nga mga organisasyon para sa panugyan sa polisia kag bulig teknikal.

Si Dean Edna Co sang UP-NCPAG nagpahayag nga ang sinapul maga-serbe bilang alagyan sa pagtan-aw liwat sa pagtu-on kag kinagawi sang public administration and governance samtang ini nagatukod sang tradisyon, naga-atubang sang mga panghangkat, kag naga-panan-aw sa padayun nga kontribusyon sini sa serbisyo publiko.

Ang mga ikaduha nga tema amo: “Public Administration and Governance Education: Pedagogy, Tradition and Emerging Challenges,” “Excellence, Professionalization, Innovation and Transformation” and “Public Service Today and in the Future” nga magapatigayon sang teoriya, kinagawi kag mga huyog sa public administration kag governance education kag research, pagpadalagan sang nga burukratiko nga mga institusyon, polisia pampubliko kag palibot, pagpakigbahin sang mga tawo, reporma sa serbisyo sibil, serbisyo sibil sa konteksto sang tawhanon nga kinamatarong, demokratisasyon, lokalisasyon sang mga polisia kag pangkalibutan nga pagbuligay para sa kauswagan.
Ang iban pa nga mga opisyales nga magapasakup sa sinapul amo sanday Department of the Interior and Local Government Secretary Jesse M. Robredo, Commission on Human Rights chairperson Loretta Rosales, Civil Service Commission chairperson Francisco T. Duque, Senator Antonio Trillanes IV, Presidential Adviser on Environmental Concerns Nereus Acosta, Governor Joey Salceda of Albay, UP President Alfredo Pascual, kag Mandaluyong City Mayor Benjamin Abalos, Jr.

Mga Public administration and governance scholars kag practitioners halin sa Japan, Malaysia, Indonesia, Botswana, Zambia, Sweden, Switzerland, United Kingdom, United States of America, Germany, India kag sang Pilipinas magapakigbahin man sang ila ihibalo kag ikasarang. (rck/JCM/PIA6)