Hiligaynon News: UK, US nagdayaw sa mga reporma sang gobyerno

By Atty. Ma. Janet C. Mesa

Monday 11th of June 2012

MANILA, Hunyo 11 (PIA) -- Ang adbokasiya ni Presidente Benigno S. Aquino III sa pagdula sang korapsyon, mga hilimu-on nga korapt kag mga korapt nga mga opisyales kag empleyado sa pag-implementar sang mga reporma kasunod sa iya nga “daan nga tuwid” nga kampanya sadtong eleksyon nakakuha sang pagdayaw sang mga opisyales sang Britanya kag Amerika.

Sa isa ka pahayag sang Presidente sa iya pag-abot sa Ninoy Aquino International Airport ang Presidente nagsiling nga si UK Primer Ministro David Cameron, ang Duke sang York Prince Andrew kag maskin si US President Barack Obama tanan nagpahayag sang ila pagdayaw kung paano nag-ayo ang Pilipinas sa idalum sang iya administrasyon.

Suno sa Presidente nga sa Britanya, nasugalinon niya ang ila Primer Ministro David Cameron kag si Prince Andrew nga gintugyanan sa pagduso sang mga negosyo sang Britanya. Dugang sang Presidente nga nakita nila kung paano nag-ayo ang ginakadtu-an sang tuwid na daan kag ang mga oportunidad sa ekonomiya nga nabuksan bangud sa pag-uswag sang aton pungsod.

Gintudlo sang Presidente nga ang Britanya nagdayaw man sang Pilipinas sa iya mga tikang nga iduso ang paghinambalanay sa kalinongan kag sa pag-agum sang pagsanyug nga masobra sa ginapa-abot.

Suno sa Presidente, si Pangulong Obama mismo ang nagtudlo sang importansya sang Pilipinas bilang katu-ang kay pareho ang aton interest nga magpabilin nga hilway kag malinong sa West Philippine Sea.

Ang Presidente nagsiling man nga ang duha ka pungsod nagpromesa sa pag-suporta sang pungsod samtang ini nagapadayon sa pagbungkad sang korapsyon.

Ang duha ka pungsod nagdayaw sa tuwid na daan kag ginliwat nila ang ila pangako nga magbulig nga mapadali ang paglab-ot sang aton nga katuyu-an suno sa Presidente. (rck/JCM-PIA6)