Hiligaynon News: Aquino magabisita sa Quantico Marine Corps Base sa Virginia

By Atty. Ma. Janet C. Mesa

Friday 8th of June 2012

WASHINGTON DC, Hunyo 8 (PIA6) -- Si Presidente Benigno S. Aquino III magabisita sa Quantico Marine Corps Base sa Virginia wala sapayan sang iya masako nga schedule sa iya tatlo ka adlaw nga opisyal nga pagbisita sa Amerika halin Hunyo 6 – 8.

Sa isa ka interbyu ang embahador sang Pilipinas sa Amerika nga si Jose Cuisia nagsiling nga ang Quantico Marine Corps Base isa ka FBI Training academy sa Amerika nga nagahatag sang paghanas sa mga bag-o nga ahente sang FBI.
Ang Quantico Marine Corps Base naga-imbitar man sang mga kandidato halin sa iban nga mga pungsod agud magpartisipar sa pangkalibutan nga paghanas. Sa subong ang Pilipinas may isa ka opisyal sang Police nga nagapakigbahin sa pangkalibutan nga paghanas suno kay Cuisia.

Si Cuisia nagdagmit nga ang pagbisita sang Presidente pagahimu-on bangud sang iya interes nga makita ang pasilidades sang nagahanas nga akademiya.
Nagsiling si Cuisia nga interesado ang Presidente sa pagtan-aw sang pasilidades sang akademiya kag sila nagapa-abot nga makakuha sang mas madamu nga kahigayunan nga mahanas ang aton mga opisyales sa police bangud sila nagahatag sang mas abanse nga paghanas labi nagid sa pagpaniktik kag sa operasyon sa pagpangita kag pagsagup.
Si Cuisia nagnotar man nga ang paghanas sa akademiya sang mga Police mangin bentaha sa ila kag sa bilog nga pungsod.

Sa nagliligad, may madamu nga kahigayunan nga ginhatag sa aton apang bangud sa kakulangan sang badget, ang aton nga kahigayunan nabuhinan, suno kay Cuisia. (rsda/JCM-PIA6)