Hiligaynon News: Mga manugpahunan gin-imbitar nga mag partisipar sa mga Public-Private Patnership nga proyekto

By Atty. Ma. Janet C. Mesa

Thursday 7th of June 2012

LONDON, Hunyo 7 (PIA) -- Si Presidente Benigno S. Aquino III naghingyo sa mga mga taga-Englatera nga manugpahunan nga magpartisipar sa mga proyekto sang Pilipinas sa Public- Private Partnership (PPP).

Si Presidente Aquino nagtanyag sini nga imbitasyon sa iya pagpakigpulong sa kay Prime Minister David Cameron sa 10 Downing Street sang Miyerkoles nga kabahin sa iya opisyal nga pagbisita sa United Kingdom of Great Britain kag Northern Ireland.

Sa tingub nga pahayag ni Presidente Aquino kag Prime Minister Cameron, ang duha ka mga lederes naghisugot nga pasangkaron pa gid nga kooperasyon sa ekonomiya agud madugangan ang pagnegosyo kag pahunan sa tunga sang Pilipinas kag UK.

Sa ila pagpulong, si Presidente Aquino nagpahiblo man kay Prime Minister Cameron sang mga proyekto sang Pilipinas sa Public-Private Partnership kag nag-imbitar sang gobyerno sang UK kag sang mga negosyante sa pagpadyun sa pagbahin sang ila malapad nga eksperyensiya sa sini nga bagay kag naghingyo sa ila nga manugpahunan sa pagpakigbahin sa sini nga mga proyekto.

Ang leder sang UK sa pihak nga bahin, nagpaseguro sa kay Presidente Aquino nga ang gobyerno sang UK nakahatag kag padayun nga magahatag ang ila ihibalo sa Pilipinas sa pagpatigayun sang programa sang PPP kag nagapa-abot sa mga kompaniya nga British sa pagpartisipar sa mga proyekto.

Ang Pilipinas kag ang United Kingdom naga-angkon sang masangkad nga pag-updanay sa ekonomiya sa mga nagliligad nga tinuig. Ang United Kindom amo ang nagapangibabaw nga manupahunan kag ang pinakadaku nga merkado sa turismo sa Europa.

Si Presidente Aquino nagdagmit man nga ang Pilipinas nagahatag sang makakulunyag nga mga oportunidad sa pahunan para sa mga negosyante, labi nagid sa sektor sang enerhiya, imprastraktura, business-process outsourcing, teknolohiya sa impormasyon kag turismo.

Pagkatapos sang iya pagpakigpulong sa UK Prime Minister, si President Aquino nagtambong sang isa ka panyaga nga gintanyag sang iya Kamahalan, Reyna Elizabeth kag ginpangunahan ni Minister Jeremy Browne kag sang Lord Mayor sang London Alderman David Wootton sa Lancaster House. (CO/JCM-PIA6, PCOO)