Hiligaynon news: Daku nga pagbuhin sang extrajudicial nga pagpatay sa pungsod nakit-an

By Atty. Ma. Janet C. Mesa

Thursday 24th of May 2012

MANILA, Mayo 24 (PIA) –- Ang Malacanang nagnotar sang daku nga pagbuhin sang mga kaso sang extrajudicial nga pagpatay sa pungsod kag ini bangud sa padayon kag tingub nga pagpaninguha sang mga nakalain-lain nga mga ahensya sang gobyerno sa idalum sang Presidential Human Rights Committee (PHRC), nga gintugyanan sa pag-uyat sang mga kaso sang pang-abuso.

Sa isa ka press briefing, si Deputy Presidential Spokesperson Abigail Valte nagsiling nga ang gobyerno seryoso sa pagduso sang protesyon sang tawhanon nga kinamatarung agud maseguro ang pagsunod sini nga tinutuyo.

Halin sa 2008 tubtub 2011, may 27-28 ka mga kaso sang extrajudicial nga pagpatay ang nabaton sang PNP Task Force USIG. Ang mga eksperto halin sa European Union nakanotar man sa pagnubo sang mga kaso, labi nagid sa pagsugod sang administrasyon ni Presidente Aquino suno kay Valte.

Ini bangud sa pag-ulolupod sang mga ahensya kag mas gindugangan nga kooperasyon agud masabat ini nga mga isyu. Halimbawa, suno kay Valte nga ang AFP nag-institutionalize sang pagproteksyon sang tawhanon nga kinamatarung, kag sa una nga hitabo naghimo sang AFP human rights handbook.

Ini ginapatagtag na kag ginatudlo sa lebel sang paghanas siling ni Valte. Ang AFP padayun man nga naga-trabaho upod sang mga iban nga stakeholders sa human rights advocacy groups. Padayon man ang mga konsultasyon, kun ano ang mga problema kag kung ano ang posible nga mga solusyon para matapos na ang mga kaso, dugang ni Valte.

Si Valte nagsiling nga samtang may pagnubo sa mga numero, ang administrasyon indi mag-untat sa pagtrabaho agud madula ang mga kaso sang extrajudicial killings sa pungsod.

Si Valte nagnotar man nga ang Presidential Human Rights Committee (PHRC) padayon nga nakatutuk sa iya mga responsabilidad kag naga-presentar sang iya pagtan-aw sang mga hitabo sa United Nation’s Universal Periodic Review.

Ang Presidential Human Rights Committee padayon nga nagatrabaho upod sa Commission on Human Rights.
Nagsiling man si Valte nga iga-presentar ini nga mga hitabo sang delegasyon sang Pilipinas kun sila magatambong sa Universal Periodic Review sa May 29, 2012.

Ang UPR isa ka regular nga pagpanalawsaw nga ginahimo kada apat ka tuig sang UN Human Rights Council nga ginatapu-an sang mga myembro sang UN nga mga pungsod (jcl//JCM/PIA6)