Hiligaynon News: CSFI scholarship may pundo nga P3-M

By Atty. Ma. Janet C. Mesa

Thursday 17th of May 2012

MANILA, Mayo 17 (PIA6) -- May pundo nga P3 milyones nga bulig sa programa sa scholarship sang Congressional Spouses Foundation Inc. (CSFI), ang ginpagwa sang Presidente suno sa kay Executive Secretary Paquito N. Ochoa Jr.

Ini nga bulig pinansyal, suno kay Ochoa pagakuhaon halin sa Presidential Social Fund kag ini ginapa-abot nga magtib-ong sang programa sa scholarship sang CSFI nga nagasanto sa mga initiatibo sang gobyerno sa paghimo sang edukasyon nga mas malapit sa mga kabataan.

Suno sa kay Ochoa, ang gobyerno determinado sa pagpatigayon sang mga reporma kag sa pagpaayo sang sistema sa edukasyon sang pungsod kag sa paghatag sa mga imul nga wala sang kuwarta sa pagpadala sang ila mga kabataan sa eskwelahan. Gin tudlo man ni Ochoa ang pagsuporta sang Kongreso sa administrasyon Aquino sa pagtuman sang iya tinutuyo sa paghatag sang poder sa mga Pilipino, labi nagid ang mga kabataan paagi sa mas maayo nga kalidad sang edukasyon.

Sa una nga duha ka tuig sang Presidente, ang badyet para sa edukasyon nakabaton sang daku nga pagsaka, nga nagtugot sa gobyerno sa pagsabat sang kakulangan sang manunudlo kag mga klasehan siling ni Ochoa.

Ang dugang na pundo pagagamiton sa pagkuha sa dugang nga 13,000 ka mga manunudlo; pagpatindog, pagkaayo o pagpaayo liwat sang 45,231 ka mga klasehan kag sa pagbakal sang masobra sa 2.53 milyones kag mga lamesa kag siya.

Kasunod sini nga pagtaas sang badyet, ang aton conditional cash transfer nga programa magatutuk sa pagbantay sa mga pamilya nga benepisaryo sa pagsulod sang ila mga kabataan sa day care kag kindergarten sa naga edad 3 – 5 ka tuig kag sa primary kag secondary nga mga bulothu-an sa naga-edad 6 – 14 siling ni Ochoa.

Si Ochoa nagdamit man sa importansya sang edukasyon sa pagbulig sa mga kabataan matuman ang ila damgo kag kabahin sa pagtulod sa pungsod padulong sa progreso kag kauswagan.

Mga 100 ka mga high school gradwado sa High School ang una nga pagahatagan sang CSFI sang scholarship. (pcoo/JCM/PIA6)