Hiligaynon news: Kindergarten gintagaan sang US$1.5 M grant halin sa Japan

Thursday 29th of March 2012

MANILA, Marso 29 (PIA6) – Pakatapos nga mapirmahan ang laye tuhoy sa Kindergarten sa Enero sini nga tuig, nga nagamandu nga tanan nga mga bata nga naga edad sang lima ka tuig dapat magpalista sa Kindergarten agud ma preparar sila sang maayo para sa pormal nga pag-eskwela, isa ka suporta pinansyal halin sa gobyerno sang Japan nga nagabili sang US $ 1.5 milyon ang nabaton sang gobyerno.

Ang Japan Fund for Poverty Reduction (JFPR) magahatag sang grant nga US$1,500,000 agud makadugang sang access sa de-kalidad nga temprano nga edukasyon para sa mga kabataan sa mga imul nga mga komunidad sa Department of Education (DepEd) nga amo ang ahensya nga magapatigayon sini.

And Asian Development Bank (ADB) nagapatigayon sang JFPR kasunod sa isa ka kasugtanan nga ginpirmahan sang ADB upod sa gobyerno sang Japan. Ini iga-implementar sang Aklat, Gabay, Tungo sa Pag-angat at Pag-asa (AGAPP) Foundation. Ang DepEd kag ang AGAPP amo ang magapatigayon sang proyekto sang JFPR project nga may katutum kag pagkatandus suno sa kasugtanan.

Ang proyekto nagatuyo sa pag-suporta sang DepEd’s K to 12 nga programa labi nagid sa pag–institutionalize sang Kindergarten paagi sa pagpatindog sang mga klasehan, curriculum development kag sa paghanas sa mga manunudlo.

Si Education Secretary Bro. Armin A. Luistro FSC nagsiling nga ini amo ang pinaka-abi-abi nga hitabo bangud ini nagasanto sa posisyon sang DepEd sa importansya nga ginahatag sa basic education labi nagid sa childhood education.

Ang grant amo ang magapundo sa mas malapad nga access sa edukasyon sa kindergarten sa paghatag sang mga kinahanglan nga mga imprastraktura kag mga pasilidad. Ini magadugang man sang kapasidad sang mga maestra sa paghatag sa ila sang paghanas kag mga workshop.

Ini magasakop man sang mga education stakeholders sa komunidad sa pagtukod sang tayuyun nga kumbuya sa civil society, corporate sector, kag local non-government organizations (NGOs). Ang grant magahatag man sang pundo para sa project monitoring kag evaluation.(JCM/PIA6)