Tagalog News: Kabayanihan ni Gat Jose Maria Panganiban, inalala sa kanyang ika-149 kaarawan

Friday 3rd of February 2012

DAET, Camarines Norte, Peb 3 (PIA) -- Isinagawa ang isang ugnayan at talakayan kahapon sa Camarines Norte sa pag-alala sa ika-149 kapanganakan ng bayaning si Gat. Jose Maria Panganiban o JOMAPA na kilala rin bilang “Avenger of Filipino Honor.”

Pinangunahan ito ng Museum, Archives and Shrine Curation Division ng pamahalaang panlalawigan.

Tema ng selebrasyon ang “JOMAPA: Seeing the Bright future through the Lens of Compassion, Integrity and Service.”

Nauna rito nagpalabas ng isang Atas Tagapagpaganap bilang 2012-01 si Gobernador Edgardo A. Tallado na naghihikayat sa selebrasyon ng ika-149 kapanganakan ng naturang bayani sa lalawigan.

Ayon kay Museum curator Abel C. Icatlo ng nasabing tanggapan, ang lecture forum ay isinagawa sa Little Theater ng kapitolyo probinsiya at dinaluhan ng mga mag-aaral mula sa pribado at pampublikong paaralan sa elementarya.

Tinalakay sa lecture forum ang kasaysayan at talambuhay ni JOMAPA kaugnay sa mga kabayanihang ginawa niya sa kalayaan ng Pilipinas noong panahon ng Espanyol.

Si JOMAPA ay isang manunulat at isa sa mga bayani sa panahon ng Espanyol na nakilala rin bilang Avenger of Filipino Honor.

Siya ay ipinanganak noong ika -1 ng Pebrero, 1863 sa isang bayan na sa kanya rin ipinangalan na dating tinatawag na Mambulao na ngayon ay Jose Panganiban. (MAL/RBM/ROVJ-PIA Camarines Norte)