Masbateno news: Napundo na paghurar san mga botante sa siyudad san Masbate ipapadayon na buwas

By Rogelio Lazaro

Tuesday 31st of July 2012

SIYUDAD SAN MASBATE, Hulyo 31 (PIA) -- Ipapadayon na buwas san Commission on Elections sa siyudad san Masbate an nabitin na paghurar san mga botante kag balidisyon sa registration records agod sinda makaboto sa pirilian sa Mayo 13, 2013.

Guin suspender san opisina an proseso tuna Hulyo 2 kay an mga sinakupan kag kagamitan sani guin destino anay sa Autonomous Region in Muslim Mindanao agod pumuan an Comelec personnel na nasambit na rehiyon na naghiwat san pagpahurar san mga botante san Hulyo 9-18.

Sa pahinumdom na guin pilit sa opisina sani, guin paaram san city election officer na ang mga sinakupan sani magabalik sa guin takda na panahon para ipadayon ang paghurar kag pagpabalido san registration records buwas.

Pareho san mga adlaw antes an isad kabulan na suspension, an opisina maga abre tuna alas-8 san aga hasta alas-5 san hapon, Lunes pa-Sabado kaupod an holidays.

Tanan na kwalipikado na botante guina padumdom na magparehistro san atab agod makalikay sa naandan na suruksukan na paghurar kung naga dangadang na an Oct. 31 deadline.

Segun sa Comelec, biometric technology o automated photograph, finger-print kag signature-taking system an gamit sa paghurar kag balidisyon.

Dahilan sani kinahanglan personal na maghurar o magpasa san aplikasyon an botante.

Valid identification card o legal na dokumento lang an kinahanglan na darhon san aplikante kag dili an cedula kag barangay certification an ipresentar kay dili ini babatonon san opisina san Comelec kun maghurar. (MAL/RAL-PIA5 Masbate)